प्रदेश २ : प्रहरी भ्यानको ठक्करबाट एकको मृत्यु

टुडेपाटी–
सर्लाही, पुस १२ गते ।

प्रहरीको भ्यानको ठक्करबाट सर्लाहीमा एकजनाको मृत्यु भएको छ ।

भ्यानको ठक्करबाट ईश्वरपुर नगरपालिका–५ का रामकुमार महतोको मृत्यु भएको जिल्ला प्रहरी कार्यालय सर्लाहीका प्रहरी प्रवक्ता प्रहरी नायव उपरीक्षक माधव प्रसाद बुढाथोकीले जानकारी दिए ।

आइतवार राति सर्लाहीको ईश्वरपुर स्थित ईलाका प्रहरी कार्यालय केशरगंजको गस्तीमा हिँडेको भ्यानले महतोलाई ठक्कर दिएको हो ।

ठक्करबाट मृत्यु भएका महतो व्यवसायी थिए । घटनाको विरोधमा बयलबास बजारका व्यापारीहरुले आज विहानैदेखि विरोध प्रदर्शन गरिरहेका छन् । बयलबास बजार पूर्ण रुपले बन्द गरिएको छ ।

उद्योग वाणिज्य संघ ईश्वरपुरको आयोजनामा प्रदर्शनकारीहरुले ईलाका प्रहरी कार्यालय केशरगंज अगाडी टायर बालेर विरोध प्रदर्शन गरिरहेका छन् ।

गएराती ९ बजेतिर भ्यानले ठक्कर दिँदा गम्भिर घाईते महतोको सदरमुकाम मलंगवा स्थित जिल्ला अस्पतालमा उपचार गर्दा गर्दै राती नै मृत्यु भएको प्रवक्ता बुढाथोकीले जानकारी दिए ।

महतोलाई गस्तीमा हिँडेको प्रहरी भ्यानले ईश्वरपुर नगरपालिका कार्यालय भन्दा दक्षिण पट्टी ठक्कर दिएको हो ।

बयलबास बजारमा फेन्सी पसल संचालन गर्दै आएका महतो पसल बन्द गरेर मामाघर चन्द्रनगरतर्फ मोटरसाईकलमा जाँदै दुर्घटनामा भएको थियो ।