प्रदेश २ : १२ किलो गाँजासहित ३ जना पक्राउ

टुडेपाटी-
बारा, कार्तिक १७ गते ।

लागुऔषद गाँजा सहित तीनजना बाराबाट पक्राउ परेका छन् । पक्राउ पर्नेमा मकवानपुरको राक्सिराङ गाउँपालिका–२ बस्ने २३ वर्षीय सुमन रुम्बा, २० वर्षीय बिजय थिङ र १९ वर्षीय अखिल मोक्तान रहेको जिल्ला प्रहरी कार्यालय बाराले जनाएको छ ।

गएराती इलाका प्रहरी कार्यालय जीतपुरबाट खटेको प्रहरी टोलीले उनीहरुलाई गाँजासहित पक्राउ गरेको हो ।

जीतपुरसिमरा उपमहानगरपालिका–७ स्थित टेढा रोडमा उनीहरुको झोला चेकजाँच गर्दा गाँजा फेला परेको जिल्ला प्रहरी कार्यालय बाराका प्रवक्ता प्रहरी नायब उपरीक्षक गौतम मिश्रले जानकारी दिए ।

उनका अनुसार ४ वटा पोकामा १२ किलो गाजा उनीहरुले बोकेका थिए । उनीहरुलाई पक्राउ गरी लागू औषध मुद्दामा बारा जिल्ला अदालतबाट म्याद थप गरी थप अनुसन्धान शुरु गरिएको छ ।