सर्लाहीबाट एक थान कटुवा पेस्तोल र ५ राउण्ड गोली बरामद

टुडेपाटी-
सर्लाही, भदौ १८ गते ।

सर्लाहीको लालबन्दीबाट एक थान कटुवा पेस्तोल र त्यसमा लाग्ने ५ राउण्ड गोली बरामद भएको छ । सशस्त्र प्रहरीले शुक्रबार बिहान साढे ५ बजे लालबन्दी नगरपालिका–५ स्थित रेल्वे ट्रयाकबाट हतियार बरामद गरेको हो ।

सशस्त्र प्रहरी सुरक्षा बेस क्याम्प हरिवनबाट सशस्त्रका डीएसपी दीपेन्द्र थापाको कमाण्डमा खटिएको गस्ती टोलीलाई देख्नासाथ प्रदेश न २–०२–००४ प ७७५७ नम्बरको अपाचे मोटरसाइकल छाडेर चालक फरार भएको थियोे । उक्त मोटरसाइकल चेकजाँच गर्दा लेगगार्डमा झुण्ड्याएर राखेको झोलामा एक थान कटुवा पेस्तोल र पाँच थान गोली बरामद भएको सशस्त्र प्रहरी उपरीक्षक गंगाराम श्रेष्ठले जानकारी दिए ।

Sponsored

श्रेष्ठका अनुसार एक राउण्ड पेस्तोलमा लोड भएको र ४ राउण्ड बाहिरै रहेको गोली बरामद भएको हो । बरामद भएको हतियार र मोटरसाइकल अनुसन्धानका लागि ईलाका प्रहरी कार्यालय लालबन्दीलाई बुझाइएको उनले बताए ।