वषौंदेखिको जीर्ण सडक मर्मतको माग गर्दै स्थानीय युवाद्वारा जनकपुरमा प्रदर्शन

टुडेपाटी-
जनकपुरधाम, भदौ १३ गते ।

वर्षौंदेखि जीर्ण रगेको जनकपुरधाम उपमहानगरपालिका-१ स्थित पुलचोकको सडक मर्मतको माग गर्दै स्थानीय युवाहरूले टायर बालेर प्रदर्शन गरेका छन् ।

आइतबार बिहान सर्वसाधारण तथा स्थानीयवासीलाई आवतजावतमा समस्या भएको भन्दै युवाहरुले टायर बालेर प्रदर्शन गरेका हुन् ।

जनकपुरधाम–युदकोहा सडकखण्ड अन्तर्गत जनकपुरधाम १ स्थित पुलचोकमा स्थानीय युवाहरुले सडक अवरुद्ध गरेको स्थानीय युवा किसन साहले जानकारी दिए । उनका अनुसार स्थानीयले टायर बालेर र बाँस तेर्स्याएर सडक अवरुद्ध गरेका थिए ।

सडकमा भएका ठूला–ठूला खाल्डोको मर्मत गर्न पटकपटक सम्बन्धित निकायलाई ध्यानाकर्षण गराए पनि चासो नलिएपछि आफुहरु बाध्य भएर आन्दोलनमा उत्रनुपरेको साहले बताए ।

अहिले लगातार वर्षा हुँदा खाल्डोमा पानी जमेर एकदमै समस्या भएको स्थानीयको भनाइ छ ।