सर्लाहीमा हात्तीको आक्रमणमा परी एकजनाको ज्यान गयो

टुडेपाटी-
सर्लाही, असार ९ गते ।

सर्लाहीमा जंगली हात्तीको आक्रमणमा परी एकजनाको ज्यान गएको छ । आक्रमणबाट ईश्वरपुर नगरपालिका-१३ श्रीनगर निवासी ५५ वर्षीय रामाशिष महतोको ज्यान गएको हो ।

महतोलाई बुधबार बिहान साँढे १ बजे आफ्नै घर अगाडी जंगली हात्तीले आक्रमण गरेको थियो । हात्तीको आक्रमणबाट सख्त घाइते भएका महतोको लालबन्दीस्थित मोडेल अस्पतालमा उपचार गर्दागर्दै बिहान ३ बजेतिर मृत्यु भएको प्रहरीले जनाएको छ ।

छेउमै रहेको अर्को घरमा सुतेका छोराबुहारी चिच्याएको आवाज सुनेपछि आफू सुतिरहेको घरबाट टर्चलाईट बालेर बाहिर निस्कने बितिकै महतोलाई हात्तीले आक्रमण गरेको थियोे । हात्तीले घरमा क्षति पुर्याउन थालेपछि छोराबुहारीले होहल्ला गर्न थालेको र छोराबुहारी चिच्याएको सुनेपछि अर्को घरमा सुतिरहेका महतो टर्चलाईट बालेर बाहिर निस्कने वितिकै आक्रमणमा परेको एक स्थानीयले बताए । हात्तीले केही घरहरुमा समेत सामान्य क्षति पुर्याएको प्रहरीले जनाएको छ ।

Sponsored

विगत दुई महिनाभन्दा बढी समयदेखि सर्लाहीको ईश्वरपुर, लालबन्दी, हरिवन लगायत पालिकाका विभिन्न गाउँका घरहरुमा क्षति पुर्याउँदै आएको तीनवटा हात्तीको समूहले पहिलो पटक मानवीय क्षति समेत गरेको छ ।