धनुषामा प्रहरीलाई १४ हजार घुस दिन खोज्ने एकजना ढल्केवरबाट पक्राउ

टुडेपाटी-
जनकपुरधाम, चैत २४ गते ।

धनुषामा प्रहरीलाई घुसरकम दिन खोज्ने एकजनालाई पक्राउ परेको छ । पक्राउ पर्नेमा धनुषाको सबैला नगरपालिका २ का ३७ वर्षिय मुकेश पुर्वे रहेका छन् ।

पूर्वेले जुवातास खेलाउने वातावरण मिलाइदिनु भन्दै प्रहरीलाई घुस रकम दिन खोज्दा पक्राउ परेको इलाका प्रहरी कार्यालय ढल्केवरका प्रहरी निरीक्षक तीर्थकुमार कार्कीले जानकारी दिए ।

पुर्वेले इलाका प्रहरी कार्यालय ढल्केवरका एक प्रहरीलाई जुवातास खेलाउने वातावरण मिलाइदिनु भन्दै १४ हजार रकम घुस दिन खोजेका थिए । पक्राउ परेका पूर्वे जुवातास खेलाउने व्यवसायी रहेको उनलृे बताए ।

प्रहरी निरिक्षक कार्कीका अनुसार जुवातास खेलाउन दिनु भनी प्रहरीलाई घुस दिन खोजेपछि पुर्वेलाई ढल्केवरको एक होटलबाट पक्राउ गरिएको हो ।

पक्राउ परेका पुर्वेमाथि थप अनुसन्धान भइरहेको इलाका प्रहरी कार्यालय ढल्केवरले जनाएको छ ।