कार चोरेर भाग्दै गरेको बटेश्वरका ३ चोर लालबन्दीबाट समातिए

टुडेपाटी-
जनकपुरधाम, चैत १७ गते ।

धनुषामा कार चोरेको आरोपमा तीनजना पक्राउ परेका छन् । कार चोरेर भाग्दै गरेको अवस्थामा तीनैजना पक्राउ परेको हो ।

पक्राउ पर्नेमा धनुषाको बटेश्वर गाउँपालिका वडा नम्बर २ का राजकुमार साह, संजीव यादव र वडा नम्बर १ का अनिल मण्डल रहेका छन् । 

सोमबार राति बटेश्वर गाउँपालिका-३ कोइरियानी टोल रामचन्द्र महतोको घरमा पार्किङ्ग गरी राखेको अवस्थामा बा ४ च ३९७५ नम्बरको सेन्ट्रो कार चोरी भएको थियो । 

लक तोडी कार चोरी भएको सूचना प्राप्त हुन साथ बटेश्वर प्रहरी चौकीका इन्चार्ज भैइरव बहादुर रावलको कमाण्डमा खटिएको प्रहरी टोलीले तीनैजनालाई सर्लाहीको लालबन्दीबाट कारसहित पक्राउ गरेको छ । 

कार चोरेको आरोपमा प्रक्राउ परेका तीनै जनालाई इलाका प्रहरी कार्यालय महेन्द्रनगरमा राखेर थप अनुसन्धान भइरहेको प्रहरीले जनाएको छ ।