रौतहट किसान आन्दोलनमा भाग लिएका वामपन्थी नेता विष्णुबहादुर मानन्धरको निधन

टुडेपाटी-
जनकपुरधाम, चैत १६ गते ।

नेपाली कम्युनिष्ट आन्दोलनका स्थापित पुराना वामपन्थी नेता विष्णुबहादुर मानन्धरको निधन भएको छ । ९१ वर्षको उमेरमा सोमबार बेलुका ८ः३० बजे उनको निधन भएको हो ।

केही दिनअघि अस्वस्थ्य भई उनलाई पाटन अस्पताल भर्ना गरिएको थियो । 

नेता मानन्धरले सरकार, सत्ता र शक्तिको पछाडि नलागेका नेताका रुपमा छवि बनाएका थिए । 

२००७ सालदेखि आफ्नै पिताले किसानलाई दिएको ऋणका तमसुक च्यातेर राजनीति सुरु गरेका मानन्धरले २००९ सालको रौतहट किसान आन्दोलनमा युवा नेताका हैसियतले भाग लिएर राजनीतिमा प्रवेश गरेका थिए । 

मानन्धरका एक छोरा र तीन छोरी छन् । उनको दाहसंस्कार मंगलबार बिहान ८ बजे पशुपति आर्यघाटमा गरिने उनका छोरा सुनिलले जानकारी दिए ।