महोत्तरीमा ट्याक्टरको ठक्करबाट मोटरसाइकल चालकको ज्यान गयो

टुडेपाटी-
महोत्तरी, चैत ५ गते ।

महोत्तरीमा ट्र्याक्टरले ठक्कर दिँदा मोटरसाइकल चालकको मृत्यु भएको छ । मृत्यु हुनेमा धनुषाको मुखियापट्टी मुसरनियाँ गाउँपालिका-३ बैरियाका बजरङ्गी साहका २० वर्षीय छोरा नितेशकुमार साह छन् ।

बुधबार साँझ मटिहानी-जनकपुर सडकखण्डअन्तर्गत मटिहानी नगरपालिका-२ स्थित आवर गाउँमा दुर्घटनामा परी साहको मृत्यु भएको जिल्ला प्रहरी कार्यालय महोत्तरीका प्रवक्ता एंव प्रहरी नायब उपरीक्षक प्रकाश विष्टले जानकारी दिए ।

दुर्घटनामा परी गम्भीर घाइते भएका महोत्तरीको मटिहानी नगरपालिका-८ का राजेन्द्र साहका २६ वर्षीय छोरा सरोजकुमार साहको मटिहानी हेल्थ केयरमा उपचार भइरहेको छ ।

धिरापुर गाउँबाट मटिहानी बजारतिर जाँदै गरेको ज१त ७४८४ नम्बरको ट्र्याक्टरले विपरीत दिशाबाट आउँदै गरेको नम्बर नखुलेको मोटरसाइकललाई ठक्कर दिँदा सो दुर्घटना भएको थियो । बुधबार राति करीब ७ः३० बजे भएको दुर्घटनामा गम्भीर घाइते भएका मोटरसाइकल चालक नितेशलाई उपचारका लागि जिल्ला अस्पताल जलेश्वर लैजाँदै गर्दा बाटोमै मृत्यु भएको प्रहरीले जनाएको छ । प्रहरीले ट्र्याक्टर र त्यसका चालकलाई नियन्त्रणमा लिएको छ ।

मृतक नितेशको शव परीक्षणका लागि जिल्ला अस्पताल जलेश्वरमा राखिएको छ ।