महोत्तरीमा डकैती गरेर भाग्दै गरेका चार डाँका पक्राउ

टुडेपाटी-
जनकपुरधाम, माघ २९ गते ।

महोत्तरीमा डकैती गरेको अारोपमा चारजना पक्राउ परेका छन् ।

पक्राउ पर्नेमा जिल्लाको बलवा नगरपालिका–७ बस्ने ३८ वर्षीय विक्रु महतो कोइरी, २५ वर्षीय निरेखन मण्डल, जलेश्वर नगरपालिका–६ बस्ने २० वर्षीय जीतेन्द्र ठाकुर र महोत्तरी गाउँपालिका–३ बस्ने २० वर्षीय दिलीप मण्डल रहेको प्रहरीचौकी सीतापुर भंगहाले जनाएको छ ।

बुधवार राति डेढबजे भंगहा नगरपालिकाको सिंग्याही बजारमा अवस्थित शिव ज्वेलर्समा लुटपाट गरी भाग्ने क्रममा स्थानीयले एक जनालाई पक्राउ गरेको थियो ।

ती लुटपाट गर्ने युवकको बयानको अाधारमा अन्य तीनजनालाई प्रहरीले बिहीबार नै बनौटाबाट पक्राउ गरेको छ ।

पक्राउ परेका चारमाथि शिव ज्वेलर्सबाट दुई लाख बराबरको सुनचाँदीका गहना लुटेर भागेको आरोप लागेको छ । उनीहरुबाट अहिलेसम्म कुनै वस्तु बरामद नभएको जिल्ला प्रहरी कार्यालय महोत्तरीका प्रहरी नायब उपरीक्षक विष्टले बताए ।

पक्राउ गरिएका चारै जनामाथि आवश्यक अनुसन्धान भइरहेको जनाइएको छ ।