सप्तरीमा बेवारिसे नवजात शिशु भेट्यो, आमाबुवा खोज्दै प्रहरी

शुभ नारायण यादव

सप्तरी, कार्तिक १९ गते ।

सप्तरीको छिन्नमस्ता गाउँपालिकामा एक नवजात शिशु वेवारिसे अवस्थामा फेला परेको छ।

छिन्नमस्ता गाउँपालिका–३ स्थित सखडा र गोविन्दपुर गाउँको बीचमा रहेको नहरको मुनी भर्खरै जन्मिएको शिशु जीवितै फेला परेको हो ।

वेवारिसे अवस्थामा उक्त शिशुलाई स्थानीयवासीबासिहरुले देखेर खबर गरेपछि प्रहरी र जनप्रतिनिधि पुगेर उद्धार गरी स्वास्थ्य चौकी सखडामा उपचारका लागि भर्ना गराएका छन्।

नवजात शिशुको शरीरभरी रातो कमिलाहरुले टोक्दै गरेको अवस्थामा स्वास्थ्य चौकी ल्याइएको र प्राथमिक स्वास्थ्य जाँच र उपचार गरिएको स्वास्थ्य चौकी सखडाले जनाएको छ।

शिशुको स्वास्थ्य अवस्था सुधारोन्मुख रहेको स्वास्थ्य चौकीका इन्चार्ज अहेव अजयकुमार झाले जानकारी दिए । थप उपचारकालागि शिशुलाई गजेन्द्रनारायण सिंह अन्चल अस्पताल पठाइएको छ ।
शिशुको आमा बुवाको भने प्रहरीले खोजी गरिरहेको इलाका प्रहरी कार्यालय सखडाका सई विन्देश्वरप्रसाद यादवले जानकारि दिए । घटना सम्बन्धमा थप अनुसन्धान भइरहेको प्रहरीले जनाएको छ ।