ओलीसँगको बैठकपछि प्रचण्ड गुटमा फुट : खुमलटार बैठकमा बामदेव र बादल पुगेनन्

टुडेपाटी

काठमाडौँ, साउन ४ गते ।

प्रधानमन्त्री तथा नेपाल कमयुनिष्ट पार्टी (नेकपा) अध्यक्ष केपी शर्मा ओली र अर्का अध्यक्ष पुष्पकमल दाहालबीचको शक्ति संर्घर्ष चलिरहँदा प्रचण्ड गुटमै मतभिन्नता बढेको छ ।

मंसिरमा महाधिवेशन गर्ने केपी ओलीको प्रस्तावमा सहमति जनाएपछि आफ्नै गुटमा आलोचित बनेका नेकपा अध्यक्ष प्रचण्डले बरिष्ठ नेताहरुलाई बोलाएर ओलीसँगको कुराकानीबारे प्रष्ट्याउने प्रयास गरेका छन् ।

तर सो बैठकमा प्रचण्ड गुटका मानिएका नेकपाका दुइ प्रभावशाली नेता बामदेव गौतम र गृहमन्त्री राम बहादुर थापा बादल अनुपस्थित भएको बताइएको छ ।

प्रचण्डनिवास खुमलटारमा बिहान ९ बजेदेखि सचिवालयका चार नेताहरुबीच छलफल भइरहेको छ । छलफलमा बरिष्ठ नेता झलनाथ खनाल, माधवकुमार नेपाल र प्रवक्ता नारायणकाजी श्रेष्ठ छन् ।

तीननेताले महाधिवेशन मंसिरमा असम्भव रहेको भन्दै ओलीको प्रस्तावमा असहमति जनाएका छन् ।
आफ्नै समूहका नेताहरु असन्तुष्ट बनेपछि प्रचण्डले आइतबार बिहान उनीहरुसँग परामर्श गरेका हुन् ।

यसअघि खुमलटार बैठकमा सहभागी हुने गरेका सचिवालय सदस्य रामबहादुर थापा बादल भने खुमलटारको छलफलमा सहभागी भएनन् । बादलले ओलीको प्रस्तावमा समर्थन जनाइसकेका छन् ।
उपाध्यक्ष बामदेव गौतम र महासचिव विष्णु पौडेलले भने प्रचण्डलाई एक्ला एक्लै भेटेका छन् ।

ओलीले तत्काल आफूमाथिको संकट टार्न महाधिवेशनको बल्छी फालेको माधव नेपाल पक्षको बुझाइ छ । प्रचण्डसँग माधव नेपाल असन्तुष्ट बनेपछि खुमलटारमा पुनः छलफल भएको हो ।

अपराह्न स्थायी कमिटी बैठक बस्ने भनिए पनि अन्योल कायमै छ ।