पार्टी फुटाउन पाइँदैन भन्दै नेकपाको जनकपुर पार्टी कार्यालयमा युवा र विद्यार्थीको धर्ना

टुडेपाटी-
जनकपुरधाम, असार २६ गते ।

पार्टी फुटको संघारमा पुगेको बेला नेकपा समर्थित युवा र विद्यार्थी संगठनले जनकपुर स्थित पार्टी कार्यालयमा धर्ना दिएका छन् । फुटाउन नहुने माग गर्दै राष्ट्रिय युवा संघ नेपाल र अखिल नेपाल राष्ट्रिय स्वतन्त्र विद्यार्थी युनियन धनुषाले शुक्रबार संयुक्त रुपमा पार्टी कार्यालय धनुषामा धर्ना दिएको हो ।

फुटवादीहरु होसियार, एमसीसी खारेज गर, संसद अधिवेशन चालु गर लगायतको नारा लेखिएको प्लेकार्ड सहित दुवै संगठनका नेता कार्यकर्ताले पार्टी कार्यालयमा धर्ना दिएका हुन् ।
उनीहरुले पार्टी फुटाउन कुनै किसिमको गतिविधि नगर्न र नगराउन धर्ना दिँदै जिल्ला पार्टी कार्यालय मार्फत केन्द्रिय पार्टी कार्यालयमा ज्ञापन पत्र बुझाएको हो ।

युवासंघका धनुषा जिल्ला संयोजक सरोज यादव र अखिल राष्ट्रिय स्वतन्त्र विद्यार्थी युनियन धनुषाका संयोजक आर.पी यादवले संयुक्त रुपमा हस्ताक्षर गरेको ज्ञापन पत्र पार्टी नेतृत्वलाई पठाइएर सवधान गराइएको जनाएको छ ।

प्रधानमन्त्री केपी शर्मा ओली सरकारको बचाउमा बुधबार जनकपुर लगायत देशको विभिन्न ठाउँमा उनका निकटले गरेको प्रदर्शनलाई युवा र विद्यार्थी संगठनले उच्सृंखल गतिविधिको सज्ञा समेत दिएका छन् । उच्सृंखल गतिविधिले पार्टी भित्र र आम जनतामा नकरात्मक असर परेकाले यस्ता गविधिहरु नगर्न नगराउन पनि माग गरेको छ ।