कञ्चन हत्या प्रकरण : अघोरी बाबासहित २० जना पक्राउ, अझै आएनन् पोष्टमार्टम रिपोर्ट

टुडेपाटी-
जनकपुरधाम, असार २१ गते ।

जनकपुरधमा उपमहानगरपालिकामा एक बालिकालाई बलात्कार गरि हत्या गरिएको आशंकामा एक अघोरी बाबासहित २० जना पक्राउ परेका छन् । गत बुधबार विहान ११ बजे भैसी चराउन घरबाट निस्केका १० वर्षीय बालिका कञ्चनकुमारी पजियारको शव शुक्रबार स्थानीय दुधमती नदीको किनारामा शव फेला परेको थियो ।

शव फेला परेको दिन प्रहरीले जनकपुरधाम उपमहानगरपालिका २१ कुर्थास्थित घाटमा बस्ने एक अघोरी बाबासहित २ जनालाई प्रहरीले नियन्त्रणमा लिएकोमा अहिले थप १८ जनालाई पनि नियन्त्रणमा लिएर अनुसन्धान भइरहेको धनुषा प्रहरलिे जनाएको छ ।

घटनास्थलबाट प्रमाणको रुपमा ब्लैंकेट समेत फेला पारेको छ ।

शनिबार नै ७ जना डाक्क्टरको समूहले ती बालिकाको शवको पोस्टमार्टम गरेपनि रिपोर्ट भने अहिलेसम्म नआएको जिल्ला प्रहरी कार्यालय धनुषाका प्रहरी नायव उपरीक्षक तथा प्रहरी प्रवक्ता रामेश्वर कार्कीले जानकारी दिएका छन् ।

पोष्टमार्टम रिपोर्ट नआउञ्जेलसम्म हत्यापूर्व बलात्कार भएको हो वा होइन भन्ने आशंका पुष्टि गर्न नसकिने डिएसपी काकीले बताए।

प्रकृति हेर्दा हत्या नै गरेको हो भन्न सकिने भएपनि यथार्थ चित्र पोष्टमार्टम रिपोर्ट आएपछि मात्र बाहिरिने प्रवक्ता कार्कीले स्पष्ट पारेका छन् ।

यता घटनाबारे धनुषाका प्रहरी प्रमुख एसपी रमेश कुमार बस्नेतका अनुसार अनुसन्धान तीव्र रुपमा अगाडि बढाइएको भन्दै अनुसन्धानका लागि हालसम्ममा २० जनालाई पक्राउ गरिएको छ ।

यसैबीच नेपाली कांग्रेस जनकपुरधाम नगर समितिका सभापति मनोजक साहले बालिकाका हत्यारालाई कडा कारवाहीको माग गरेका छन् ।