सिरहामा बसको ठक्करबाट २ जनाको ज्यान गयो

नितेश यादव-
जनकपुरधाम, माघ २७ गते ।

सिरहामा सवारी दुर्घटनामा परी २ जनाको ज्यान गएको छ । सिरहाको नरहा गाउँपालिका ५ मा बसले ठक्कर दिँदा मोटरसाइकलमा सवार २ जनाको ज्यान गएको हो ।

सिरहा नगरपालिका ३ रमौलका २९ वर्षीय अमन मण्डल र सिराहा ३ कै मख्नाका ४५ वर्षीय शैलेन्द्रकुमार मण्डलको ज्यान गएको जिल्ला प्रहरी कार्यालय सिरहाले जनाएको छ ।

सोमबार बिहान साढे ५ बजे ना४ख ९२४१ नम्बरको बसले लु१६प ४४४१ नम्बरको मोटरसाइकललाई ठक्कर दिएको थियो ।

अमनको उपचारको क्रममा विराटनगरस्थित न्युरो अस्पतालमा मृत्यु भएको हो भने शैलेन्द्रको लहानको रामकुमार सारदा उमाप्रसाद मुरारका स्मारक अस्पतालमा उपचारकै क्रममा बिहान ७ बजे मृत्यु भएको सिरहाका प्रहरी उपरीक्षक उमाप्रसाद चतुर्वेदीले जानकारी दिए ।

ठक्कर दिने बस प्रहरीको नियन्त्रणमा रहेको छ । बसको चालक फरार भएको चालकको खोजी भइरहेको छ ।