धनुषामा चौक विवाद : झडपमा ९ प्रहरी घाइते, प्रहरीको गोली लागेर युवक गम्भीर
टुडेपाटी
जनकपुरधाम, चैत ४ गते ।
धनुषामा दुई समुहको झडपमा ९ प्रहरीसहित १० जना घाइते भएका छन् । जस मध्ये प्रहरीले चलाएको गोली लागेर एक युवक गम्भीर घाइते भएका छन् ।
सबैला नगरपालिका–९ भठियानमा प्रहरीको गोली लागेर सहिद नगरपालिका–१ कुम्भकरणका २० वर्षीय सन्तोषकुमार यादव गम्भीर घाइते भएका छन् । उनलाई मलद्वारमा गोली लागेको धनुषाका प्रहरी प्रवक्ता डिएसपी बरुणबहादुर सिंहले जानकारी दिए ।
गोली लगोर गम्भीर घाइते यादवलाई प्रादेशिक अस्पताल जनकपुरमा राखिएको थियो । यहाँ उपचार सम्भव नभएपछि नेपाली सेनाको स्काई ट्रकबाट थप उपचारको लागि काठमाडौं स्थित ट्रामा सेन्टर लगिएको धनुषाका प्रहरी उपरीक्षक (एसपी) भुवनेश्वर तिवारीले जानकारी दिए ।
यस्तै प्रदर्शनकारीको ढुंगामुढाबाट ९ जना प्रहरी घाइते भएको एसपी तिवारीले बताए । उनका अनुसार पाँचजना जनपथ र ४ जना सशस्त्र प्रहरी घाइते भएका हुन् ।
भठिहनस्थित चोकमा केही समय अघि यादव चोक लेखिएको बोर्ड राखिएको थियो । त्यसपछि अन्य समुदायले सो बोर्ड उखेलेर फालेपछि विवाद चर्किएको हो ।
