धनुषामा घरभित्र गाडिएको अवस्थामा महिलाको शव फेला, श्रीमान र १० महिने छोरी बेपत्ता
टुडेपाटी-
जनकपुरधाम, फागुन १७ गते ।
धनुषाको लक्ष्मीनिया गाउँपालिका–बनिनियामा एक महिलाको शव घरकै पूजाकोठामा गाडिएको अवस्थामा फेला परेको छ। २० वर्षीया अञ्जली यादवको शव सडेको अवस्थामा फेला परेको हो।
धनुषाका प्रहरी प्रवक्ता डीएसपी वरुणबहादुर सिंहका अनुसार स्थानीयले श्रीमान बेपत्ता भएको खबर गरेपछि अनुसन्धान गर्दा शव भेटिएको हो।
प्रहरी टोलीले खोजतलास गर्ने क्रममा मंगलबार दिउँसो १ बजे अञ्जलीको शव गाडिएको अवस्थामा फेला परेको थियो।
प्रहरीले श्रीमान हरिराम यादवले पत्नी अञ्जलीको हत्या गरेर शव लुकाएको हुन सक्ने आशंका गरेको छ। हरिराम हाल वेपत्ता छन् भने उनीहरूकी १० महिने छोरी पनि साथमै हराइरहेकी छिन्।
स्थानीयका अनुसार शनिबार राति दम्पतीबीच विवाद भएको थियो। आइतबार बिहान हरिरामले अञ्जली बेपत्ता भएको बताएका थिए। तर, मंगलबारदेखि उनी स्वयं पनि लापत्ता भएपछि स्थानीयले शंका गरी प्रहरीलाई खबर गरेका थिए। अनुसन्धानका क्रममा घरभित्र खोज्दा पूजाकोठामा शव गाडिएको अवस्थामा भेटिएको डीएसपी सिंहले जानकारी दिए।
शवलाई उत्खनन गरी पोस्टमार्टमका लागि प्रादेशिक अस्पताल लगिने तयारी भइरहेको छ। हरिराम यादव र उनकी छोरीको खोजी जारी रहेको प्रहरीले जनाएको छ।
