धनुषामा बोरामा शव : अनैतिक सम्बन्ध लुकाउन प्रेमीलाई कतारबाट बोलाएर पतिसँग मिलेर हत्या

टुडेपाटी-
जनकपुरधाम, फागुन १५ गते ।

धनुषामा ४ पुसमा बोरामा शव भेटिएका युवकको तीन महिना पश्चात् सनाखत भएको छ । धनुषाको मिथिला बिहारी नगरपालिका–२ पुरनदाहा टोलस्थित खैरा खोलाको पुलमुनि युवकको शव धनुषाको कमला नगरपालिका ६ का ३३ वर्षीय शहिद अन्सारीको भएको पुष्टि भएको हो ।

प्रहरीले पत्ता लगाउन सार्वजनिक गरेको स्केच मृतककी श्रीमती अजिमा खातुनले पहिचान गरेपछि शहिदको सनाखत भएको धनुषाका प्रहरी उपरीक्षक (एसपी) भुवनेश्वर तिवारीले जानकारी दिए ।

घटनाको अनुसन्धानबाट उनको हत्या अनैतिक प्रेम सम्बन्धको कारणले भएको खुलेको छ । अंसारीलाई मिथिला विहारी नगरपालिका ६ की अनिता कुमारी यादव र उनका श्रीमान राजकिशोर यादवले मिलेर हत्या गरेको अनुसन्धानबाट खुलेको एसपी तिवारीले बताए ।

प्रहरीका अनुसार कतारमा कार्यरत अन्सारी र अनिताबिच दुई वर्षदेखि प्रेम सम्बन्ध थियो । सहिद विदेशमा हुँदा अनितासँग फोन संवादसँगै पैसा पनि पठाउने गरेको अनुसन्धानबाट खुलेको हो ।

विदेशबाट बोलाएर हत्या

अनिताले मृतकको श्रीमती अजिताको नाउँमा बिरामी रहेको भन्दै फर्जी रिपोर्ट पठाएर अन्सारीलाई आकस्मिक छुट्टी लिन लगाई नेपाल बोलाएकी थिइन् । मंसिर २६ गते शहिद विदेशबाट त्रिभुवन अन्तराष्ट्रिय विमानस्थल काठमाण्डौमा आएपछि अनितालाई सम्पर्क गरेका थिए । काठमाण्डौबाट विपी राजमार्ग हुँदै मिथिला विहारी नगरपालिकाको तारापट्टी सिरसियामा बेलुका राति ८ः २३ बजे आएका थिए । राति अनिताको घरमा पुगे । त्यहाँ उनलाई बन्धक बनाइएको थियो । अनिताले त्यसअघि नै आफ्नो श्रीमान् राजकिशोरलाई १५ मंसिरमै विदेश साउदीबाट नेपाल आफ्नो घर बोलाएकी थिइन् ।

सहिद काठमाडौंबाट फर्किएकै भोलिपल्ट २७ मंसिरमा बिहान ११ः०० बजे आफ्नै घरको सुत्ने कोठामा बन्धक बनाई बन्चरोको प्रयोग गरी हत्या गरेको भन्ने अनुसन्धानबाट खुलेको एसपी तिवारीले बताए । त्यसपछि उनीहरुले शव जुटको बोरामा राखेर खोलामा फालेका थिए ।

शव फेला परेपछि सडेगलेको कारण युवकको सनाखत हुन सकेको थिएन । धनुषा प्रहरीले स्केच बनाएर सार्वजनिक गरेको थियो । १० फागुनमा मात्र मृतककी पत्नी अजिता खातुनले स्केच हेरेर शवको पुष्टि गरेकी थिइन् ।

घटना पश्चात् राजकिशोर पुनः साउदी पुगेका छन् । उनकी श्रीमती अनितालाई पक्राउ गरी कर्तव्यज्यान मुदाका धनुषा, जिल्ला अदालतबाट तीन को म्याद थप गरी थप अनुसन्धान कार्य गरिरहेको जिल्ला प्रहरी कार्यालय धनुषाले जनाएको छ ।