१५ दिने मिथिला मध्यमा परिक्रमा सुरु
टुडेपाटी-
जनकपुरधाम, फागुन १५ गते ।
मिथिलाञ्चल क्षेत्रका धार्मिक तथा ऐतिहासिक महत्व बोकेको १५ दिने मध्यमा परिक्रमा आजदेखि सुरु भएको छ। धनुषाको मिथिला बिहारी नगरपालिकाको कचुरीबाट मिथिला बिहारीको डोला प्रस्थान गरेको हो । मिथिलाविहारी मन्दिरबाट मिथिलाविहारीजीको डोला प्रस्थान गरेपछि परिक्रमाको शुभारम्भ भएको मानिन्छ ।
आज दिउँसो मिथिला बिहारीको डोला जनकपुरधाम आइपुगेर अग्निकुण्डमा विश्राम गर्नेछ। त्यसपछि किशोरीजीको डोलासहित जनकपुरका विभिन्न मठमन्दिर परिक्रमा गरी हनुमाननगरतर्फ जाने कार्यक्रम रहेको छ। हनुमाननगरमा राति विश्राम गरेपछि परिक्रमा भोलि भारतको बिहार राज्यस्थित कलनाको कल्यानेश्वर प्रस्थान गर्ने छ ।
फागु पूर्णिमासम्म चल्ने यस परिक्रमा यात्रामा धनुषा, महोत्तरी र भारत बिहारका विभिन्न ऐतिहासिक तथा धार्मिक स्थलहरूको भ्रमण गरिन्छ। कुल १२० किलोमिटर दूरीको परिक्रमामा नेपालतर्फ ९० किलोमिटर तथा भारततर्फ ३० किलोमिटर यात्रा तय गरिन्छ।
परिक्रमा क्रममा सहभागीहरू क्रमशः जनकपुरको हनुमाननगर, भारतको कलना स्थित कल्यानेश्वर, फुलहरको गिरिजा स्थान, महोत्तरीको मठिहानी, जलेश्वर, मडई, ध्रुवकुण्ड, कञ्चनवन, पर्वता, धनुषाधाम, सतोखर, औरही, भारतको करुण र विसौल हुँदै अन्तिम दिन जनकपुरधामको अन्तरगृह परिक्रमा गरेर सम्पन्न हुने गर्छ।
यस धार्मिक यात्रामा परम्परागत बाजागाजा, झाँकी, कीर्तन तथा मौलिक पहिरनमा लाखौं श्रद्धालु भक्तजनको सहभागिता रहनेछ। मिथिलाञ्चलमा तीन प्रकारका परिक्रमा— वृहत्त, मध्य र अन्तरगृह परिक्रमा गरिन्छ, जसमा मध्य परिक्रमा विशेष रूपमा महत्वपूर्ण मानिन्छ। परिक्रमा गर्दा विभिन्न दुःखकलेशसहित मोक्ष प्राप्ति हुने जनविश्वास छ ।
विभिन्न चुनौतीहरूका बाबजुद पनि मध्य परिक्रमा प्रति श्रद्धालुहरूको आकर्षण उल्लेखनीय रहेको छ।
