कुम्भ मेलाबाट फर्किंदै गर्दा स्कार्पियो दुर्घटना : चार नेपालीको मृत्यु, ६ गम्भीर
टुडेपाटी-
जनकपुरधाम, फागुन १०
भारतको उत्तर प्रदेशस्थित प्रयागराजमा कुम्भ मेला भरेर फर्किंदै गर्दा भएको स्कार्पियो दुर्घटनामा चार नेपालीको मृत्यु भएको छ भने छ जना गम्भीर घाइते भएका छन्।
उत्तर प्रदेशको बाँसगाउँ थाना क्षेत्रअन्तर्गत गोरखपुर लिंक रोडमा स्कार्पियो गाडी ट्रयाक्टरको ट्रलिसँग ठोक्किँदा दुर्घटना भएको हो।
मृत्यु हुनेहरूमा सप्तरी जिल्लाको कञ्चनरुप नगरपालिकाका तीन जना रहेका छन्। उनीहरूमा कञ्चनरुप नगरपालिका–७ की लिलादेवी चौधरी, कञ्चनरुप–७ कै पर्शुराम चौधरी र कञ्चनरुप–५, पिपरा पूर्वका जितु यादवकी श्रीमती हरिहरदेवी यादव छन्। त्यस्तै, सुनसरीको कुशाहा गाउँपालिका–१ की समतोलिया देवी यादवको पनि मृत्यु भएको छ।
सप्तरीका प्रहरी प्रवक्ता डिएसपी जितेन्द्र वस्नेतले कञ्चनरुप नगरपालिकाका तीन जनाको मृत्यु र तीन जना गम्भीर घाइते भएको पुष्टि गरेका छन्।
उनका अनुसार दुर्घटनामा शिक्षक उपेन्द्र चौधरी, जितु यादवसहित छ जना गम्भीर घाइते भएका छन्। घाइतेहरूलाई गोरखपुरस्थित स्थानीय अस्पतालमा उपचारका लागि भर्ना गरिएको छ। दुर्घटनामा सप्तरीका तीन जना र उदयपुरका दुई जना गम्भीर घाइते भएको जानकारी प्राप्त भएको डिएसपी वस्नेतले बताएका छन्।
