वीरगञ्जको सातवटा निजी अस्पतालमा मुख्यमन्त्रीको छड्के अनुगमन
टुडेपाटी-
जनकपुरधाम, फागुन ७ गते ।
मधेश प्रदेशका मुख्यमन्त्री सतिशकुमार सिंहले वीरगन्जका निजी अस्पतालहरूमा छड्के अनुगमन गरेका छन्। उनले बुधबार साँझ वीरगञ्ज महानगरपालिकाका सातवटा निजी अस्पतालको निरीक्षण गरेका हुन्।
भवानी हस्पिटल एण्ड रिसर्च प्रालि, प्रभु हस्पिटल एण्ड रिसर्च सेन्टर, सर्वोत्तम हस्पिटल, नेपाल इण्डो हस्पिटल एण्ड आई सेन्टर, स्पर्श मल्टिस्पेसिलिटी हस्पिटल, गण्डक हस्पिटल प्रालि र शाह हस्पिटल प्रालिमा मुख्यमन्त्रीले छड्के अनुगमन गरेका हुन्।
अनुगमनका क्रममा नेपाल इण्डो हस्पिटल एण्ड आई सेन्टरले अस्पताल सञ्चालनका लागि आवश्यक इजाजतपत्र तथा अन्य कागजात नराखेको पाइएपछि मुख्यमन्त्री सिंहले तत्काल अस्पताल बन्द गर्न निर्देशन दिएका छन्। यो जानकारी अनुगमन टोलीमा सहभागी प्रदेश स्वास्थ्य मन्त्रालयका जनस्वास्थ्य अधिकृत सन्तोष ठाकुरले दिएका छन्।
त्यस्तै, इजाजतपत्र नविकरण नगरिएका भवानी हस्पिटल एण्ड रिसर्च प्रालि र स्पर्श मल्टिस्पेसिलिटी हस्पिटललाई तत्काल नविकरण गराई सम्पूर्ण कागजातसहित प्रदेशको स्वास्थ्य मन्त्रालयमा उपस्थित हुन निर्देशन दिइएको छ।
अनुगमनका क्रममा अस्पतालजन्य फोहोरको उचित व्यवस्थापन नभएको, विपन्न तथा ज्येष्ठ नागरिकलाई उपचार शुल्कमा १० प्रतिशत छुट दिने प्रावधान लागू नगरिएको तथा स्वीकृत शय्याभन्दा बढी सञ्चालन गरिएको जस्ता त्रुटिहरू भेटिएको मुख्यमन्त्री सिंहले बताए। सम्बन्धित अस्पतालका सञ्चालक तथा व्यवस्थापकहरूलाई मौखिक सचेत गराइएकाले १० प्रतिशत छुट दिएको प्रमाण मन्त्रालयमा पेश गर्न निर्देशन दिइएको छ।
यसअघि, मुख्यमन्त्री सिंहले जनकपुरका ४० भन्दा बढी निजी अस्पतालहरूको अनुगमन गरी नियमविपरीत सञ्चालित १० वटा अस्पताल बन्द गराइसकेका छन्।
