काठमाडौंमा स्कुल बस दुर्घटनाः तीन विद्यार्थीको मृत्यु, ४० घाइते
टुडेपाटी-
जनकपुरधाम, माघ ३० गते ।
काठमाडौंको शंखरापुर नगरपालिका–५ मा भएको स्कुल बस दुर्घटनामा तीन विद्यार्थीको मृत्यु भएको छ भने ४० जना घाइते भएका छन्।
जिल्ला प्रहरी परिसर काठमाडौंका प्रवक्ता एसपी अपिलराज बोहोराका अनुसार मृत्यु हुनेहरूमा मोरङ उर्लाबारी–७ का ११ वर्षीय क्रिशल पुरी, सिन्धुपाल्चोक बलेफी–७ का २४ वर्षीय सुरेश तामाङ, र सिन्धुपाल्चोककी १४ वर्षीया शुशांका डोटेल रहेका छन् । मृतकमध्ये एक जनाको नेपाल मेडिकल कलेज, एक जनाको शंखरापुर अस्पताल, र एक जनाको त्रिवि शिक्षण अस्पतालमा उपचारका क्रममा निधन भएको हो ।
चाबहिलको मैजुबाहलस्थित सत्य साई एकेडेमीका विद्यार्थी बोकेको बा २ ख ७९५८ नम्बरको बस नगरकोट पिकनिक गएर फर्किने क्रममा साँझ करिब ५ बजे दुर्घटनामा परेको हो। प्रारम्भिक अनुसन्धानअनुसार बस ब्रेक फेल भएर दुर्घटना भएको बताइएको छ। बस चालक सिन्धुपाल्चोक चौताराका ३९ वर्षीय मनिष माझी रहेको खुलेको छ ।
घाइतेमध्ये २४ जनाको पिपुल्स लाइफ केयर अस्पताल, १० जनाको नेपाल मेडिकल कलेज, तीन जनाको त्रिवि शिक्षण अस्पताल, तथा केहीको शंखरापुर अस्पतालमा उपचार भइरहेको छ । घाइतेहरूमा अधिकांश विद्यार्थी रहेका छन् ।
दुर्घटना विषयमा थप अनुसन्धान गरिरहेको प्रहरीले जनाएको छ ।
