यातायात कार्यालय लहानमा १० वर्षदेखि दाहालको रजगज, मान्दैनन् मधेश सरकारको सरुवा

टुडेपाटी-
जनकपुरधाम, माघ १३ गते ।

सिरहाको यातायात व्यवस्था कार्यालय लहानका अधिकृत छैटौँ विजय दहालको १५ असोजमा श्रम तथा यातायात मन्त्रालयमा सरुवा भयो । मन्त्रालयको १४ असोजको निर्णय अनुसार १५ असोजमा पत्र पठाएपनि दहाल माघ ९ गतेसम्म हाजिर भएका छैनन् । मन्त्रालयका सूचना अधिकारी सुनिलकुमार साहले अधिकृत दहाल अहिलेसम्म मन्त्रालयमा हाजिर भएका छैनन् ।

दहालको यो पहिलो सरुवा भने होइन । साउन २८, २०७१ मा उनी पहिलोपटक यातायात व्यवस्था कार्यालय सगरमाथा, लहानमा खरिदारका रूपमा आएका थिए । त्यसबेलादेखि एक वर्ष मात्र कार्यालय बाहिर बसेका दहाल अहिले छैटौँ अधिकृतसम्म बढुवा भइसकेका छन् । तर लहान कार्यालयमै कायम छन् ।

एक वर्षभित्रै मात्र दहालको तीन पटक सरुवा भएको छ । भदौ २०८० मा उनलाई मधेशको उद्योग तथा पर्यटन मन्त्रालयमा सरुवा गरिएको थियो । तर उनले त्यहाँ पनि काम गरेनन् । मुख्यमन्त्री कार्यालयलाई प्रभावमा पारेर दहाल फेरि यातायात कार्यालय लहानमै बस्न सफल भए । त्यसपछि मुख्यमन्त्री कार्यालयले १८ चैत २०८० मा उनलाई भू तथा जलाधार कार्यालय लहानमा सरुवा गर्यो । तर, जलाधार कार्यालयमा पनि उनी हाजिर भएनन् । अनाधिकृत रुपले यातायात कार्यालयमै रहिरहे ।

असोज १५ मा श्रम तथा यातायात मन्त्रालयले उनलाई पुनः आफ्नै मन्त्रालयमा सरुवा गरे पनि दहाल अझै त्यहाँ पुगेका छैनन् । पटक पटक सरुवा हुँदा पनि सरुवा भएको कार्यालय नजानुको कारणबारे प्रश्न गर्दा उनले अब जान्छु जवाफ दिए । अरु केही कुरा नभनि अलमलिँदै उनले जवाफ दिए ‘अब चाँडै जान्छु’

यातायात कार्यालयहरु माल अड्डाका रूपमा चिनिन्छ । मुख्यमन्त्री कार्यालयका अनुसार, प्रशासनतर्फका कर्मचारीहरूले यातायात कार्यालय विशेष प्राथमिकतामा राख्ने गरेका छन् ।
साधारणतः कर्मचारीको सरुवा दुई वर्षमा हुने प्रावधान छ । २१ असार २०७३ मा खरिदारबाट नासुमा बढुवा भएका दहाल यातायात व्यवस्था कार्यालय लहानमा दोस्रोपटक ३ असार २०७४ मा समान्य प्रशासन मन्त्रालयबाट नासुमा पदस्थापन भए । त्यस यता उनको पटक पटक सरुवा भयो तर लहान यातायात व्यवस्था कार्यालयबाहेक अन्यत्र गएका छैनन् । ५ असार २०७६ मा समायोजन हुँदा पनि उनी लहान यातायातमै पदस्थापन भए ।

३० भदौ २०७७ मा, २० चैत २०७७ मा सरुवा भयो । तर उनी कार्यालय छाडेन ।
लोकसेवा आयोगम मार्फत ९ साउन २०६६ मा जिविस खोटाङमा गाविस सचिवमा पदस्थापन भएका उनी १९ असार २०७१ मा भौतिक पूर्वाधार तथा यातायात मन्त्रालयमा सरुवा भए । त्यस यता उनी यातायात कार्यालयमै कायम छन् ।

कार्यालयका कर्मचारीका अनुसार, दहालले खरिदारदेखि अधिकृतसम्मको यात्रा पूरा गर्दै कार्यालयका प्रमुखलाई समेत प्रभावित गरी आफूअनुकूल कार्यालय सञ्चालन गर्दै आएका छन् । उनको यहाँ रजगज छ ।

‘यहाँ नामका लागि कार्यालय प्रमुख रहन्छन् । कार्यालय चालउने नै अधिकृत विजय दहाल हुन् । लाईसेन्सदेखि हरेक फाँट आफ्नो नियन्त्रणमा राख्छन् । यहाँ चलखेल गरेर मोटो रकम कमाउँदैछन् । र त्यसैबाट सरकारलाई प्रभावित गरी कार्यालयमा टिकिरहेका छन् । निरन्तर साढे ७ वर्ष यहाँ बस्नु र कानुन न मान्नु नै यसको प्रमाण हो’ ती कर्मचारीले भने ।

यातायात मन्त्रालयकै एक कर्मचारीले दहालसँग यति पावर छ की उनलाई मन्त्रालयमै हाजिर गराउन कसैले नसक्ने दावी गरे ।
यातायात व्यवस्था कार्यालयमा हुने अनाधिकृत कमाइका लागि अधिकांश कर्मचारी कसरत गर्ने गर्छन् । गइसकेका कर्मचारीहरु त्यहाँबाट फर्किन मान्दैनन् । वर्षौदेखि यातायात कार्यालयमा चलखेल गरी कायम रहेका कर्मचारीहरु चलखेल गरी आफ्नो सरुवा रोकाउने गर्छन् ।

दहाल जस्तै १५ असोजमै यातायात व्यवस्था कार्यालय जनकपुरमा अधिकृत छैठौंमा रहेका रमेशकुमार दासलाई दरबन्दी कायम भएको शिक्षा विकास निर्देशनालयमा फर्किन पत्र पठायो । मन्त्रालयका सूचना अधिकारी सुनिल साहका अनुसार मन्त्रालयले उनलाई काज फिर्ता हुन दुईपटक पत्र पठाइसकेको छ । तर उनी अहिलेसम्म मन्त्रालयमा हाजिर भएका छैनन् ।