सर्लाहीमा इँटा व्यवसायी प्रसाईको हत्या, गाडिएको अवस्थामा भेटियो शव

एसपी यादव
सर्लाही, पुस २० गते ।

पुर्व पश्चिम राजमार्गमा पर्ने हरिवन नगरपालिकाका इँटा व्यवसायी हरिप्रसाद प्रसाईको हत्या भएको सर्लाही प्रहरीले जानकारी गराएका छन् ।

३९ वर्षीय प्रसाई हरिवन नगरपालिका वडा नं. १० इनारटोलका स्थायी बासिन्दा हुन् ।

प्रसाई पुस १५ गतेदेखि हराइरहेको सूचना पाउनासाथ प्रहरीले खोजतलास गर्दै जादा शनिवार बिहान ११ बजेको समयमा हरिवन नगरपालिका वडा नं. १० स्थित उखुबारीमा गाडिएको अवस्थामा उनको शव बरामद गरेको थियो ।

प्रसाई परिवारका अनुसार, उनी पुस १५ गते बिहान बरहथवा नगरपालिका वडा नं. ९ मूर्तियाबाट इँटाको पैसा लिएर आउँछु भनेर घरबाट निस्किएका थिए । तर घर नफर्किएपछि सोही दिनदेखि उनको खोजी कार्य भइरहेको थियो ।

सर्लाही प्रहरीले प्रसाईको हत्यामा संलग्न हुनसक्ने आशंकामा एक स्थानीय युवकलाई नियन्त्रणमा लिएर थप अनुसन्धान अघि बढाएको छ ।

प्रसाईको शव प्रादेशिक अस्पताल मलंगवामा पोष्टमार्टम पश्चात् परिवारलाई जिम्मा लगाइएको प्रहरीले बताएका छन् ।