मधेशको गृह मन्त्रालयमा मुख्यमन्त्री सिंहको छड्के, स्वीकृति बिनै बिदामा कर्मचारी

टुडेपाटी-
जनकपुरधाम, असोज ९ गते ।

मधेश प्रदेश सरकारका मुख्यमन्त्री सतिश सिंहले आफ्नै मातहतको गृह मन्त्रालयको छड्के अनुुगमन तथा निरीक्षण गरेका छन् ।

मुख्यमन्त्री सिंह नेतृत्वको टोलीले बुधबार दिउँसो पौने ५ बजे गृह मन्त्रालयको छड्के अनुुगमन तथा निरीक्षण गरेको हो ।

गृह मन्त्रालयका कर्मचारीहरुमा लापरबाही बढेको तथा सेवा प्रवाहमा दुःख दिने गरेको जन गुनासो बढेपछि मुख्यमन्त्री सिंहको कार्यालयले अचानक निरीक्षण गरेको जनाइएको हो ।

अनुुगमनका क्रममा गृह मन्त्रालयका कर्मचारीहरुमा चरम लापरबाही रहेको पाइएको मुख्यमन्त्री तथा मन्त्रिपरिषद्को कार्यालयले जनाएको छ ।

मुख्यमन्त्री सिंह भन्छन्, ‘सरकारको कमाण्डरको नाताले पछिल्लो समय बारम्बार छड्के निरीक्षण गरिरहेको छु, जनताको काम चाँडै होस भन्ने मेरो चाहना छ । तरपनि कर्मचारीहरुमा अझ सुधार आएको छैन । अरुलाई कानुनको पाठ सिकाउने गृह मन्त्रालयका कर्मचारीहरु नै अनुशासनहिन देखिएका छन् ।’

उनका अनुसार गृह मन्त्रालयका कर्मचारीमा खासगरी कार्यालय समयमा उपस्थित नहुने, हाजिरी गरेर बेपत्ता हुने जस्ता समस्या देखिएका छन् । ‘साथै बिना जानकारी बाहिर निस्किने, बाहिर जाँदा लगबुकमा कारण नखुलाउने प्रवृति छ, स्विकृती बिनै बिदामा बसिदिने जस्ता समस्याहरु फेला परेका छन्,’ उनले भने ।

बुधबारको निरीक्षणमा गृह मन्त्रालयमा देखिएको समस्याप्रति मुख्यमन्त्री कार्यालयको गम्भरि ध्यानाकर्षण भएको जानकारी दिएको छ ।

मुख्यमन्त्री सिंहले भने, ‘अब जनताको काममा ढिलाइ गर्ने कर्मचारीलाई माया गरिदैन, कारबाही गरिन्छ । ढुक्क भए हुन्छ मनपरी गर्नेलाई कारबाहीको दायरमा ल्याइनेछ ।’