प्रादेशिक क्वारेन्टाइनमा ५ जना कोरोना संक्रमण पुष्टि भएपछि क्वारेन्टाइन ‘सिल’

टुडेपाटी-

जनकपुरधाम, जेठ ७ गते ।

धनुषाको गंगुलीमा रहेको क्वारेन्टाइनलाई सिल गरिएको छ । धनुषाको नगराइन नगरपालिकामा रहेको क्वारेन्टाइनस्थलमा रहेका ५ जनामा कोरोना संक्रमण पुष्टि भएपछि क्वारेणटाइनलाई सिल गरिएको हो ।

एक हप्ताको अवधिमा पाँच जनामा कोरोना संक्रमण पुष्टि भएपछि क्वारेन्टाइनलाई सिल गरिएको प्रादेशिक क्वारेन्टाइन गंगुलीका संयोजक सन्तोष ठाकुरले जानकारी दिए । प्रादेशिक क्वारेन्टाइनमा भारतको विहार, उत्तरप्रदेश, दिल्लीबाट प्रहरीलाई छलेर नेपाल प्रवेश गरेकाहरुलाई क्वारेन्टाइनमा राखिएको छ । जसमा पाँच जनामा एक साता भित्रै कोरोना पोजिटिभ पाइएको छ ।

क्वारेण्टाइनमा रहेकाहरुमध्ये जेठ ३ गते एक जना, जेठ ४ गते दुई जना र जेठ ६ गते दुई जना गरी ५ जनामा कोरोना संक्रमण पुष्टी भएको थियो । सो क्वारेन्टाइनस्थललाई नेपाली सेनाको सहयोगमा सील गरिएको क्वारेन्टाइन स्थलका संयोजक सन्तोष ठाकुरले बताए ।

क्वारेण्टाइनलाई सील गरिएपछि सो क्वारेण्टाइनमा रहेका ४८ जनामध्ये कसैलाई पनि बाहिर जान नदिइने र नयाँ व्यक्तिलाई समेत नराखिने संयोजक ठाकुरको भनाइ छ ।

१ सय २० बेड संख्या रहेको सो क्वारेन्टाइनमा हालसम्म २ सय २० जनालाई राखिएको छ। जसमध्ये ५ जना संक्रमितलाई प्रादेशिक अस्पताल जनकपुरधाममा भर्ना गरिएको छ भने १ सय ४१ जना घर फर्कि सकेका छन् र बाँकी अहिले पनि क्वारेन्टाइनमै छन् ।