प्रधानमन्त्रीमा एमालेका अध्यक्ष ओली नियुक्त

टुडेपाटी-
जनकपुरधाम, असार ३० गते ।

प्रधानमन्त्रीमा नेकपा एमालेका अध्यक्ष केपी शर्मा ओली नियुक्त भएका छन् । उनलाई आइतबार राष्ट्रपति रामचन्द्र पौडेलले संविधानको धारा ७६(२) अनुसार प्रधानमन्त्रीमा नियुक्त गरेका हुन् ।

एमालेका साथै नेपाली कांग्रेसलगायत दलको समर्थनसहित ओलीले प्रधानमन्त्रीका लागि शुक्रबार साँझ दाबी पेस गरेका थिए ।

शुक्रबारको प्रतिनिधि सभा बैठकमा पुष्पकमल दाहाल प्रचण्डले विश्वासको मत नपाएपछि सोही दिन राष्ट्रपति पौडेलले धारा ७६(२) अनुसार दुई वा दुईभन्दा बढी दलको समर्थनमा प्रधानमन्त्रीमा दाबी पेस गर्न आह्वान गरेका थिए ।

नवनियुक्त प्रधानमन्त्री ओलीको पद तथा गोपनियताको शपथ भोलि सोमबार बिहान ११ बजे कार्यक्रम तय गरिएको छ ।