धनुषामा स्कूल बस र मोटरसाइक ठोक्किँदा एक युवकको मृत्यु

टुडेपाटी-
जनकपुरधाम, जेठ ४ गते ।

धनुषामा स्कूल बस र मोटरसाइक ठोक्किँदा एक युवकको मृत्यु भएको छ । मृत्यु हुनेमा मोटरसाइकल चालक विदेह नगरपालिका ७ बस्ने २० वर्षीय सन्तोष यादव छन् ।

धनुषा प्रहरीका अनुसार आज बिहान पौने ११ बजेतिर हुलाकी सडकखण्ड अन्तर्गत विदेह नगरपालिका ७ जोगियारास्थित तिनकोरियाबाट औरही तर्फ आउँदै गरेको प्रदेश २ ००२ ००४ प ३७८२ नम्बरको मोटरसाईकल र विपरीत दिशातर्फबाट जाँदै गरेको ना ४ ख ५७० नम्बरको लर्ड गणेश ईंगलिस बोर्डिंग स्कूलको बस ठोक्किएको थियो ।

ठक्करबाट गम्भीर घाइते भएका यादवलाई उपचारको लागि जनकपुर ल्याउँदै गर्दा बाटोमै मृत्यु भएको जिल्ला प्रहरी कार्यालय धनुषाले जनाएको छ । दुर्घटनामा मोटरसाइकलमा पछाडि सवार स्थानीय सुमित राइ घाइते भएका छन् । उनको जनकपुरधाम स्थित रामजानकी हस्पिटलमा उपचार भइरहेको प्रहरीले जनाएको छ ।

दुर्घटना भएको मोटरसाईकल र बस प्रहरीको नियन्त्रणमा रहेको जनाएको छ ।