सर्लाहीबाट गोली लोड गरिएको पेस्तोल बरामद

टुडेपाटी-
जनकपुरधाम, फागुन १९ गते ।

सर्लाहीबाट प्रहरीले गोली लोड गरिएको पेस्तोल बरामद गरेको छ । नेपाल भारत सीमा क्षेत्र सर्लाहीको ब्रह्मपुरी गाउँपालिका–५, इनरुवाबाट शुक्रबार साँझ बरामद गरिएको हो ।

मेड इन यूएसए लेखिएको पेस्तोल र म्यागजिनमा लोड गरिएको पाँच राउन्ड गोली बरामद गरिएको सशस्त्र प्रहरीले जनाएको छ ।
शुक्रबार साँझ ८ बजे भारतबाट नेपालतर्फ आउँदै गरेको बीआर ३० एक्स ७७१३ भारतीय नम्बरको मोटरसाइकलमा सवार दुई अपरिचित व्यक्ति चेकिङमा रहेका सशस्त्र प्रहरीलाई देख्नासाथ मोटरसाइकल छाडेर भाग्ने क्रममा उनीहरुले बोकेको हतियार खसेको थियो । ती दुवै व्यक्ति भारततर्फ नै फरार भएका छन् ।

Sponsored

बोर्डर आउट पोष्ट सखुअवाबाट गस्ती टोलीले चेक प्वाइन्ट थापेर जाँच गर्ने क्रममा हतियार बरामद भएको सशस्त्र प्रहरी बल नम्बर १० गणले जनाएको छ । गोली लोड भएको अवस्थामा पेस्तोल बरामद भएपछि कसैलाई मार्ने उद्देश्यले आएको हुनसक्ने प्रहरीको अनुमान छ ।