रौतहटको मधानी महायज्ञमा बलिउडका चर्चित अभिनेता गोबिन्दा आउने

टुडेपाटी
जनकपुरधाम, फागुन ११ गते ।

रौतहटको मौलापुरमा आयोजन हुने मधानी महायज्ञमा सहभागी हुन बलिउडका चर्चित अभिनेता गोबिन्दा आउने भएका छन् ।

परौता पुरातात्त्विक महादेव मन्दिरलाई विश्व सम्पदा सूचीमा सूचीकृत गराउने संकल्प सहित फागुन २२ देखि २६ गतेसम्म ‘मधानी महोत्सव २०८०’ हुन लागेको हो । मौलापुर नगरपालिकाले आयोजन गर्न लागेको महोत्सवमा बलिउडका अभिनेता गोबिन्दा आउने मेयर रीना कुमारी साहले जानकारी दिएकी छन् ।

महोत्सवमा फतेपुरको नाच फाल्गुन २२ र २३ गते, मधानी यज्ञ तथा शिवको बरात २३ गते, भारतको शिव लिला प्रदर्शन, फाल्गुन २३ र २४ गते, मधानी सांस्कृतिक समारोह फाल्गुन २५ गते र अन्तर्राष्ट्रिय दंगल प्रतियोगिता फाल्गुन २६ गते हुने तय भएको जानकारी दिइन् ।

मेयर साहका अनुसार महोत्सवमा बलिउडका चर्चित कलाकार गोविन्दाका साथै नेपाली कलाकारहरू पल शाहसहितका दर्जनौँ कलाकार सहभागी हुने निश्चित भइसकेको छ ।