मार्बल बोकेको लरी घरमाथि पल्टिँदा जुल्याहासहित तीन बालबालिकाको मृत्य

टुडेपाटी-
जनकपुरधाम, फागुन १२ गते ।

 मोरङमा भारतीय नम्बर प्लेटको लरी पल्टिँदा तीन बालबालिकाको मृत्यु भएको छ । भारतबाट मार्बलको ब्लक लिएर आएको आरजे २९ जीबी १५६१ नम्बरको लरी मोरंगको बुढिगंगा गाउँपालिका–४ नेमुवा चोक नजिक सडक छेउमा रहेका घरमा पल्टिँदा किचिएर बालबालिकाहरूको मृत्यु भएको हो ।

शुक्रवार बिहान करिब ८ बजेतिर दुर्घटना भएको हो । प्रहरीले दुर्घटना स्थलबाट घाइतेहरूको उद्धार गर्ने प्रयास गरे पनि मार्बलको ब्लकले किचिएर बालबालिकाहरूको मृत्यु भएको जनाइएको छ ।

प्रहरीका अनुसार बूढीगंगा–४ प्रगति टोलमा ५५ वर्षीय ज्योति अधिकारीका जुल्याहा छोराछोरीको सुतिरहेकै ठाउँमा किचिएर मृत्यु भएको छ । मृत्यु हुनेमा चार वर्षीया इसिता अधिकारी र निशान्त अधिकारी रहेको प्रहरीले जनाएको छ । 

त्यस्तै अधिकारीको घरमा रहेको पसलमा आएकी ७ वर्षीया रिया खवासको समेत लरीबाट खसेको मार्बलले किचेर मृत्यु भएको जनाइएको छ । 

दुर्घटनामा मार्बलको ब्लकले किचेर ज्योति अधिकारी समेत घाइते भएका छन् । उनको खुट्टा लरीले किचेको हो ।
प्रहरीले क्रेनको सहायताले मार्बलको ब्लक पन्छाएर उनलाई उद्धार गरी थप उपचारका लागि विराट टिचिङ अस्पताल पठाइएको मोरङ प्रहरीले जनाएको छ ।

दुर्घटनापछि लरी चालक फरार भएका छन् । उनको खोजी कार्यसंगै घटना विषयमा अनुसन्धान भइरहेको जिल्ला प्रहरी कार्यालय मोरङ् जनाएको छ ।