महोत्तरीको सम्सीमा हिन्दु र मुस्लिम समुदायबीच झडप, तीनजना घाइते

टुडेपाटी-
जनकपुरधाम, फागुन ५ गते ।

महोत्तरीको सम्सी गाउँपालिका २ परसा देवाडमा हिन्दु र मुस्लिम समुदायबीच झडप भएको छ । झडपमा तीनजना घाइते भएका छन् ।

झडप नियन्त्रणमा लिन महोत्तरी प्रहरीले चार राउण्ड हवाई फायर गरेको छ । सम्सी गाउँपालिका १ परसा देवाडमा महावीर झण्डा मेलाको कलश यात्रा वडा नं. २ स्थित नुरी मस्जिद नजिक पुगेपछि झडप भएको हो ।

झडप नियन्त्रणमा लिन चार राउण्ड हवाई फायर गरेको जिल्ला प्रहरी कार्यालय महोत्तरीले जनाएको छ ।

हिन्दु समुदायले निकालेको कलशयात्राका क्रममा मस्जिदमा ढुंगा प्रहार भएको मुसलमान समुदायको दाबी छ । हिन्दु समुदायले कलश यात्राको क्रममा जय श्रीरामको नारा लगाउँदै गर्दा मुस्लिम समुदायले आक्रमण गरेपछि झडप भएको दावी गरेका छन् ।