मधेश प्रदेश : कार्डमा भए अनुसार मेयर आर्थिक सहयता बोकेर विपन्नको छोरी विहे घरमा पुगेपछि…

टुडेपाटी
जनकपुरधाम, माघ २६ गते ।

रौतहटमा छोरीको विवाह भन्दै नक्कली विहे कार्ड छापाएर एक जनाले मौलापुर नगरपालिका कार्यालयबाट आर्थिक सहयोग लिन खोजेको खुलेको छ । मौलापुर नगरपालिका ९ सोनखियाका महिन्द्र यादवले माघ २५ गते छोरी संजु कुमारीको विहे रहेको कार्डसहित नगरपालिकाबाट ३० हजार आर्थिक सहायता माग गरेका थिए । त्यही कार्डको आधारमा वडा नं. ९ कार्यालयले उनलाई आर्थिक सहयोग गरिदिन सिफारिस गरेका थिए ।

नगरपालिका कार्यालयले विहेकै दिन छोरीको घरमा पुगेर आर्थिक सहायता बापतको चेक हस्तान्तरण गर्ने गरेको छ । कार्डमा रहेको विहेको दिन (हिजो बिहीबार) नगरपालिकाकी मेयर रिना साह ३० हजार आर्थिक सहायताको चेक लिएर महिन्द्रको घर पुगेकी थिइन् । तर घरमा विहे नै थिएन ।

‘म आर्थिक सहयोगका लागि चेक लिएर ३ पटक उनको घर पुगे । घरमा बिहे नै छैन । सीताराम लुकाइसके । उहाँको श्रीमतीलाई सोध्दा २–३ दिन अघि नै मन्दिरमा विहे भइसक्यो भन्नु भयो’ मेयर साहले भनिन् ‘छिमेकसंग सोध्दा उहाँको घरमा विहे छैन । वडाध्यक्षले भनेर त्यस्तो गरेर आर्थिक सहयोग लिन खोजेको रपरिवारले स्वीकारेको छ’

दोश्रो कार्यकालमा समेत जितेकी मेयर साहका अनुसार २०७४ सालदेखि नगरपालिका भित्रका विपन्न परिवारको छोरीको विहेमा नगरपालिका कार्यालयले वडाको सिफारिसमा ३० हजार रुपैयाँ सहयोग गर्ने गरिएको छ । जसको लागि विहेको कार्डसहित वडा कार्यालयबाट एक हप्ता अघि सिफारिस गराउनु पर्छ । त्यसपछि नगरपालिका कार्यालयले रकम सहयोग गर्दै आएको छ ।
महिन्द्रले आफ्नो छोरीको गत बैशाखमा बिहे भएको बताए । त्यतिबेला आर्थिक सहायताका लागि वडा कार्यालयबाट सिफारिस गराएर नगरपालिका कार्यालयमा दिँदा फाइल रहाएको र त्यही आर्थिक सहायता लिन यो तरिका अपनाएको महिन्द्रको भनाइ छ ।

‘मेरो नियत गलत होइन । त्यतिबेला छोरीको बिहेमा सहयोग लिन खोजेपछि नगरपालिकामा फाइल हराइदियो । म लिन खोजे जस्तै नगरपालिकाबाट अघिपछि धेरैले आर्थिक सहायता लिएका छन् । म गरिब मान्छे हुँ । अनावश्यक बदनाम र फसाउन खोज्यो’ उनले भने ।

यता वडा नं. ९ का वडाध्यक्ष श्यामकिशोर साहले आफू एमालेबाट जितेको वडाध्यक्ष हुँदा मेयर साहले रिसिबी साध्न यस्तो प्रपञ्च गरेको दावी गरे । ‘म एमालेबाट जितेको वडाध्यक्ष भएर मेयर साहेब त्यस्तो गर्न खोज्नु भएको छ । आज हाम्रो जिल्ला अधिवेशन थियो । म उत्ता गएको थिएँ’ वडाध्यक्ष साहले भने ‘यादवले एकवर्षअघि छोरीको विहे गर्नु भएको थियो । त्यति बेला उहाँले सहयोग पाउनु भएन । पटक पटक सहयोगको लागि भन्दै पनि आउनु भएको थियो । मेयरले अघिपछि विहे भएका आफ्ना थुप्रै मान्छेलाई त्यसरी नै आर्थिक सहायता वितरण गर्नु भएको छ । आफ्ना निकट धनमानी व्यक्तिलाई समेत धेरैलाई विपन्नलाई दिने छोरी विहेको आर्थिक सहताया बाँड्नु भएको छ ।’

मौलापुर नगरपालिकाकी मेयर साह एमालेबाट नै निर्वाचित छन् । उनी आम जनता पार्टी (आजपा)का अध्यक्ष तथा प्रतिनिधिसभा सदस्य प्रभु साहका श्रीमती हुन् । प्रतिनिधिसभा चुनावमा प्रभु साहले एमालेबाट विद्रह गरेपछि एमाले र उनको पक्षबीच खटपट चलिरहेको छ ।