सप्तरीबाट हतियार र बन्यजन्तुको मासुसहित सिकारी झा पक्राउ

टुडेपाटी-
जनकपुरधाम, माघ १९ गते ।

सप्तरी प्रहरीले हतियार र बन्यजन्तुको मासुसहित एकजनालाई पक्राउ गरेको छ । राजबिराज नगरपालिका ५ का ४६ वर्षीय शैलेस कुमार झालाई प्रहरीले हतियार र बन्यजन्तुको अखेटोपहार सहित पक्राउ गरेको हो ।

आज बिहान ३ बजे हनुमाननगर कंकालिनी नगरपालिका ८ स्थित बैष्णोदेवी मन्दिर नजिक २२५ नं.कोशी बांधबाट उनलाई मेगनम (राईफल) १ थान र त्यसमा प्रयोग हुने गोली ४१ थन, म्याग्जिन २ थान, गन स्टेन –१ थानसहित पक्राउ गरेको सप्तरीका प्रहरी प्रवक्ता डिएसपी ढुण्डीराज न्यौपानेले जानकारी दिए ।

उनका अनुसार यसका अलावा उनको साथबाट क्यामेरा १ थान, पावर बैंक १, मोवाईल १, लाईट –१ र दुई वटा बोरामा काटिएको अबस्थाको बन्यजन्तु मृगको जस्तो देखिने मासु ३५ किलो बरामद गरिएको छ ।

झालाई थप अनुसन्धानको लागि जिल्ला डिभिजन बन कार्यालय राजविराज सप्तरीमा पठाइएको जिल्ला प्रहरी कार्यालय सप्तरीले जनाएको छ ।