बरहथवामा भोलि बिहान ८ बजेसम्म निषेधाज्ञा जारी
टुडेपाटी-
जनकपुरधाम, पुस २१ गते ।
सर्लाहीको बरहथवामा स्थानीय प्रशासनले आज बिहानैदेखि निषेधाज्ञा जारी गरेको छ । आज बिहान ८ बजे कर्फ्युको समयसकिएपछि भोलि बिहान ८ बजेसम्मको लागि निषेधाज्ञा जारी गरेको हो ।
बरहथवा नगरपालिका ६ को प्राथमिक स्वास्थ्य केन्द्रको स्तरोन्नति विषयमा भएको प्रदर्शनमा प्रहरीको गोली लागेर स्थानीय युवा जयशंकर साहको मृत्यु भएपछि स्थिति साम्य पार्न जिल्ला प्रशासन कार्यालय सर्लाहीले हिजो शुक्रबार बेलुका साढे ५ बजेदेखि आज बिहान ८ बजेसम्मको लागि कर्फ्यु जारी गरेको थियो ।
Sponsored
बरहथवा नगरपालिकाको पूर्वमा – सीतापुर जाने बाटोको ब्रह्मस्थान, पश्चिममा हजरिया जाने बाटोको नहर, दक्षिणमा – हनुमान मन्दिर र उत्तरमा सोती÷चोर्निया पुलसम्मको क्षेत्रमा निषेधाज्ञा जारी गरेको सर्लाहीका प्रमुख जिल्ला अधिकारी कोमल प्रसाद धमलाले जानकारी दिए ।
निषेधाज्ञा जारी भएको क्षेत्रमा कुनै किसिमको भेला हुन, बाहिर हिडडुल गर्न तथा राजनीतिक सभा तथा गतिविधि गर्न नपाउने छैन ।
हिजो प्रहरीको गोली लागेर मारिएका स्थानीय युवाको शव अहिलेसम्म आन्दोलनकारीकै नियन्त्रणमा रहेको छ । आन्दोलन साम्य पार्न स्थानीय प्रशासनले स्थानीय राजनीतिक दलसंग सर्वपक्षीय बैठक बस्ने वातावरण बनाउन लागेको छ ।
Sponsored
