महोत्तरीमा मन्दिरबाट चोरिएका गहनासहित एक नाबालक पक्राउ

टुडेपाटी–
महोत्तरी, मंसिर ६ गते ।

महोत्तरीको गौशाला नगरपालिकामा रहेको दुर्गा मन्दिरबाट चोरी भएको गहनासहित एक जना पक्राउ परेका छन् ।

इलाका प्रहरी कार्यालय गौशालाका प्रमुख प्रहरी निरिक्षक मनोज कुमार यादवले गौशाला बजारमा रहेको दुर्गा मन्दिरबाट छठको पारणको दिन चोरी भएको सुनको नथिया र टिकासहित एक जना नाबालकलाई पक्राउ गरिएको जानकारी दिए ।

मन्दिरबाट चोरी भएकोे १४ आना बराबरको सुनको नथिया र टिका समेत सो बालकबाट बरामद भइसकेको प्रहरी निरीक्षक यादवले जानकारी दिँदै थप अनुसन्धान जारी रहेकोले विस्तृत रुपमापछि मात्रै भन्न सकिने जानकारी दिए ।

गौशाला बजारको बीचमा रहेको सो मन्दिर कात्तिकमा दुर्गा पूजाको अवसरमा धुमधामका साथ पूजाआजा गरी मन्दिर सञ्चालनमा ल्याइएको हो ।

माता दुर्गाका आभूषणको लागि भारतबाट करिब १० लाखमा गरगहना खरिद गरिएको बताउँदै पुजारी काशिकान्त झाले सोमबार मूर्तिबाट गरगहना चोरी भएको देखेपछि प्रहरीमा खबर गरिएको जानकारी दिए ।

प्रहरीले मन्दिरमा चोरी भएको घटनाको अनुसन्धान गर्दै जाँदा ति नाबालकलाई पक्राउ गरेको हो ।