सिरहाबाट हतियार र रकमसहित तीन युवक पक्राउ

टुडेपाटी-
जनकपुरधाम, कार्तिक २१ गते ।

सशस्त्र प्रहरीले सिरहाबाट आधुनिक हतियार र रकमसहित तीनजनालाई पक्राउ गरेको छ । पक्राउ पर्नेहरुमा सप्तरीको सुरुङ्गगा नगरपालिका ८ का ३२ वर्षीय अनिल राम , सुरुङ्गगा– ५ बस्ने बर्ष ३० का जिबान्नद चौधरी र सप्तरीकै खड्क नगरपालिका ४ बस्ने वर्ष ३५ कासंजय प्रसाद चौधरी रहेका छन् ।

सशस्त्र प्रहरी प्रबल नेपाल सिराहाको बिशेष टोलीले सोमबार साँझ सिरहाको लहान नगरपालिका १ सिङ्गराहीमा चेकजाँच गर्ने क्रममा स.९ प. ४९७१ यमहा सोलुटो मोटर साइकलमा सवार उनीहरुलाई हतियार, रकम र रिचार्जकार्डसहित नियन्त्रणमा लिएको सशस्त्र प्रहरीका मधेश प्रदेश प्रमुख डिआजी दिपेन्द्र साहले जानकारी दिए ।

पक्राउ परेकाहरुको साथबाट ९ एमएम ब्राउण्डिङ पेस्तोल १ थान , सोको म्याग्जिन १ थान, राउण्ड २ दुई , नगद १ लाख ८४ हजार २५३ रुपैयाँ, चार थान मोबाइल सेट र बिभिन्न कम्पनिको ४ लाख ६४ हजार ५ सय मूल्य बराबरको रिचार्ज कार्ड बरामद भएको छ ।

उनीहरू अपराघिक गतिविधिमा संलग्न रहेको र भविष्यमा अप्रिय घटना घटाउन सक्ने शंकास्पद भएकाले नियन्त्रणमा लगि थप अनुसन्धानका लागि सम्बन्धित निकायमा बुझाउने सशस्त्र प्रहरीले जनाएको छ ।