गौशालाबाट वृद्ध दम्पतिको ६ लाख ३६ हजार रुपैयाँ लुटेर फरार सहनी पक्राउ

टुडेपाटी-
जनकपुरधाम, कार्तिक १ गते ।

महोत्तरीको गौशलाबाट दिनदहाडै वृद्ध दम्पतिबाट ६ लाख ३६ हजार रुपैयाँ लुटपाट गर्ने एक युवक पक्राउ परेका छन् । पक्राउ पर्नेमा सर्लाहीको मंलगवा नगरपालिका ५ भाडषरका २९ वर्षीय रमेश सहनी रहेका छन् ।

गत असोज ७ गते दिउँसो गौशालाको एनआइसी एसिया बैंकबाट गौशाला नगरपालिका ११ भरतपुर टोल बस्ने शम्भु महतो र उनकी श्रीमती सुर्जकला देवी छोरीले पठाएको ६ लाख ३६ हजार रकम झिकेर घरतर्फ जाँदै गर्दा लुटिएको थियो । छोरी पुनिता देवी महतोले ओखलढुंगाबाट शम्भु महतोको श्रीमती सुजर्कला देवीको खातामा ६ लाख ३६ हजार रुपैयाँ पठाएकी थिइन् । दुबैजना झिकेर घर फर्किरहेको बेला दिउँसो २ बजे गौशालाकै हाइ स्कुल नजिकबाट भारतीय नम्बरको मोटरसाइकलमा आएका एक युवकले रकम भएको झोला खोसेर फरार भएका थिए ।

Sponsored

सिसीटिभी फुटेजको आधारमा अनुसन्धान तथा खोजतलास गर्दा रमेश सहनीले सो रकम लुटपाट गरी भागेको खुलेको हो । उनलाई बुधबार दिउँसो इलाका प्रहरी कार्यालय गौशालाको टोलिले गौशाला नगरपालिका ७ र सर्लाही हरिपुर्वा नगरपालिका ७ को सिमानाबाट पक्राउ गरेको महोत्तरीका प्रहरी प्रवक्ता डिएसपी दिलीपकुमार गिरीले जानकारी दिए । उनीमाथि अनुसन्धान गरिरहेको जिल्ला प्रहरी कार्यालय महोत्तरीले जनाएको छ ।