जनकपुरमा लिक क्रस गरिरहेको मोटरसाइकल रेलमा किचियो, मान्छे झण्डै बाँचे

टुडेपाटी-
जनकपुरधाम, असोज १६ गते ।

जनकपुर जयनगर रेलको ठक्करबाट लिक क्रस गरिरहेका एकजना मोटरसाइकल चालक घाइते भएका छन् । मोटरसाइकल किचिएर पूर्णरुपमा क्षति भएको छ ।

आज साँझ ७ बजेर ३५ मिनेटको समयमा जयनगरबाट भंगहा तर्फ जाँदै गरेको रेल जनकपुरको सीताचोक नजिक लिक क्रस गरिरहेको प्र–२–०२–००३ प ००९० नम्बरको मोटरसाइकल चपेटामा परको थियो ।

ठक्करबाट मोटरसाइकल चालक धनुषाको जनकपुरधाम उपमहानगरपालिका १९ वेङगा पिपराडीका २६ वर्षीय राकेश कुमार यादव घाइते भएका छन् । स्थानीय प्रत्यक्षदर्शीका अनुसार झण्डैले मोटरसाइकल चालकको ज्यान जोगिएको हो । मोटरसाइकलमा ठक्कर लागेपछि उनी लिक बाहिर लडेका थिए ।

सो क्रममा उनको दाँया खुट्टाको ईडी र छातीको भित्री भागमा चोट लागेर घाइते भएका हुन् । उनको उपचार प्रादेशिक अस्पताल जनकपुरमा भइरहेको छ ।