जनकपुरमा उत्तेजक अभिव्यक्ति दिने विवास्पद धर्मगुरु श्रीनिवास पक्राउ

टुडेपाटी-
जनकपुरधाम, असोज १६ गते ।

जनकपुरधाममा गौहत्याविरुद्ध उत्तेजक अभिव्यक्ति दिने धर्मगुरु श्रीनिवास आचार्य पक्राउ परेका छन् । उनलाई मंगलबार प्रहरीले सुनसरीको बराहक्षेत्र नगरपालिका–चक्रघट्टीबाट पक्राउ गरेको हो ।

प्रहरीले भने उनलाई पक्राउ गर्नुको कारणबारे खुलाएको छैन।

जिल्ला प्रहरी कार्यलय सुनसरीका प्रवक्ता डिएसपी नविनकृष्ण भण्डारीका अनुसार सामान्य सोधपुछको लागि ल्याइएको हो।
केहीदिन अघि जनकपुरधाममा गौ हत्याविरुद्ध निकालिएको जुलुसपछिको कोणसभालाई सम्बोधन गर्दै उनले गौहत्या गर्नेलाई त्यही खुकुरीले छप्काइदेउ भन्ने उत्तेजक अभिव्यक्ति दिएका थिए ।

भाषण दिँदै उनले भनेका थिए ‘हिन्दू राष्ट्र र गौहत्याको आन्दोलनमा १० वर्षअघिदेखि लागिरहेको छु। वैदिक सनातन धर्मावलम्बीहरू जिन्दावाद र मुर्दावाद मात्र भनेर हुँदैन, एकजुट हुनुपर्ने भएको छ। हाम्रो गौ मातालाई धरानमा काटिरहेका छन्, भोजपुरमा काटिरहेका छन्। झापामा काटिरहेका छन्। हामी केवल घाममा हिँडेर मात्रै गौमाता बाँच्ने छैनन्।’

उनले अगाडि भनेका थिए ‘ यदी हामी गुरुहरूले नै हतियार उठाउनुप¥यो भने ठिक हुँदैन। हामी अनुरोध गर्छौं, जसले हाम्रो गौमातालाई काट्छ त्यसलाई खुकुरी लिएर गएर काटिदिनुस्। हाम्रो धर्म र शास्त्रले गाई र माई समान रुपले हेर्छ।’

उनी ०७४ चैत २५ मा आफ्नै पाखुरामा गोलि हान्न लगाएर आरोपमा पक्राउ समेत परेका थिए।