सर्लाहीको मलंगवामा कर्फ्यू हटाइयो, निषेधाज्ञा जारी

टुडेपाटी-
जनकपुरधाम, भदौ २४ गते ।

स्थानीय प्रशासनले सर्लाही सदरमुकाम मलंगवामा लगाएको कर्फ्यू हटाएको छ । जिल्ला प्रशासन कार्याय सर्लाहीले सूचना जारी गर्दै आज बिहान ८ बजेदेखि कर्फ्यू हटाएको जनाएको छ ।
कृष्णष्टमीको मुर्ति सेलाउने क्रममा शुक्रबार साँझ हिन्दु र मुस्लिम समुदायबिच झडप भएर तनाब बढेपछि प्रशासनले शनिबार साँझ ५ बजेदेखि आज बिहान ८ बजेसम्मका लागि मलंगवा बजार क्षेत्रमा कर्फ्यू लगाएको थियो ।

शान्ति सुरक्षाको अवस्था सामान्य रहेकोले आज बिहान ८ बजेदेखि कर्फ्यू हटाएको सर्लाहीका प्रमुख जिल्ला अधिकारी इन्द्रवेद यादवले जानकारी दिए ।
यधपी सम्भावित सद्भाव खलल पुर्याउने घटनालाई मध्यनजर गर्दै मलंगवा नगर क्षेत्रमा भदौ २७ गते राति १२ बजेसम्मका लागि भेला, नाराजुलुस लगाउने जस्ता गतिविधि हुन नदिने निषेधज्ञा जारी गरेको छ ।
साविक मलंगवा नगरक्षेत्र भित्र कुनै प्रकारको भेला हुन नपाउने, जुलुस गर्न नहुने, बैठक वा प्रदर्शन वा पोष्टर, पर्चा जस्ता प्रचार सामग्री टाँस्न वा लेख्न नपाइने निषेधाज्ञा लगाएको हो ।

‘…स्थानीय प्रशासन ऐन, २०२८ को दफा ६ (क) (२) (१) र दफा ६ (ख) को (१) (ग) बमोजिम आज मिति २०८०।०५।२४ गते विहान ८ः०० बजे देखि मिति २०८०।०५।२७ गते राती १२ः०० बजे सम्मको लागि निषेधाज्ञा जारी गरिएको व्यहोरा अनुरोध छ’, निषेधाज्ञामा अघि लेखिएको छ ।