महोत्तरीमा दुई मोटरसाइकल दुर्घटनामा २ को ज्यान गयो

धनवीर महतो-
महोत्तरी, माघ २३ गते ।

महोत्तरीको छुट्टाछुट्टै ठाउँमा भएका मोटरसाइकल दुर्घटनामा परेर दुई युवकको ज्यान गएको छ ।

बिहीबार दिउँसो पिपरा गाँउपालिकामा यात्रुवाहक बससँग मोटरसाइकल ठोक्किँदा पालिकाका १७ वर्षीय राजेन्द्र शर्माको घटनास्थलमै ज्यान गएको हो । जलेश्वरबाट जनकपुरतर्फ जाँदै गरेको ज १ ख ७५८ नम्बरको यात्रुवाहक बससँग ज ७ प ८५४५ नम्बरको मोटरसाइकल ठोक्किँदा दुर्घटना भएको हो ।

मृतक शर्माको शव परीक्षणको लागि जलेश्वर अस्पतालमा राखिएको छ भने बसलाई जिल्ला प्रहरी कार्यालय धनुषामा राखिएको प्रहरीले जनाएको छ ।

यस्तै, बुधबार राति महोत्तरीको गौशाला–सम्सी सडकखण्ड अर्न्तगत औरही नगरपालिका–४ कुधारमा भएको सडक दुर्घटनामा २२ वर्षीय उमेश यादवको ज्यान गएको थियो ।