एसिया कप ३१ अगस्टदेखि पाकिस्तान र श्रीलंकामा हुने

एजेन्सी–
काठमाडौँ, जेठ ३२ गते ।

एसिया कप आगामी अगस्ट ३१ बाट हुने भएको छ ।

सेप्टेम्बरमा हुने भनिएको एसिया कपको १६औँ संस्करण सरेको हो । अब प्रतियोगिता दुई दिन अघि अर्थात अगस्ट ३१ बाट सुरू हुने भएको छ।

यसअघि प्रतियोगिता सेप्टेम्बर २ बाट सुरु हुने भनिएको थियो।

प्रतियोगिताको उद्घाटन खेल ३१ अगस्टमा पाकिस्तान र श्रीलंकाबीच हुनेछ फाइनल खेल भने सेप्टेम्बर १७ मा खेलिने तय भएको आईसीसीले जनाएको छ।

हाइब्रिड मोडलमा हुन लागेको प्रतियोगिताको चार खेल पाकिस्तानमा र बाँकी खेल श्रीलंकामा हुनेछ।

कुल १३ एकदिवसीय खेल हुने प्रतियोगितामा भारत, पाकिस्तान, श्रीलंका, बंगलादेश, अफगानिस्तान र नेपालले सहभागी हुँदैछन्।

नेपाल, भारत र पाकिस्तान एक समूहमा छन् भने श्रीलंका, बंगलादेश र अफगानिस्तान अर्को समूहमा छन्।