आजको खेल रद्द भएपछि नेपाल सेमिफाइनलमा

टुडेपाटी–
काठमाडौँ, बैशाख ११ गते ।

एसीसी प्रिमियर कपको सेमिफाइनलमा नेपाल प्रवेश गरेको छ । सोमबार नेपाल र साउदी अरेबियाबीच हुने खेल वर्षाका कारण रद्द भएपछि नेपाल सेमिफाइनलमा प्रवेश गरेको हो ।

मूलपानी क्रिकेट मैदानमा नेपालले खेल्न लागेको पहिलो अन्तर्राष्ट्रिय खेल निरन्तर वर्षाका कारण रद्द भएपछि सेमिफाइनल पुगेको छ ।

अघिल्लो दिनको साँझ वर्षाका कारण मैदान भिजेको कारण दुई घन्टा ढिलो खेल सुरु हुने तय गरिएको थियो ।

बिहान ११ बजे देखि पुनः वर्षा भएपछि खेल रद्द हुन पुगेको थियो । दिउँसो १२.३० बजे दुवै टोलीका खेलाडीले हात मिलाउँदै अंक बाँडेका थिए ।

मलेसिया र ओमानमाथि विजय हात पारेको नेपाल सोमबारको नतिजापछि समूह ‘ए’ मा ५ अंकसहित शिर्ष स्थानमा रहेको छ ।

साउदी र ओमानबीचको लिगको अन्तिम खेल क्वार्टरफाइनल सरह हुने भएको छ र जो जितेमा उही सेमिफाइनल पुग्ने छ । साउदीको ३ अंक र ओमानको ४ अंक छ ।

नेपालले अन्तिम खेल कतारसँग खेल्ने छ र यो खेल जितेमा समूह विजेता भएर सेमिफाइनल पुग्ने छ ।

फाइनल जित्ने टिमले एसिया कपमा छनोट हुनेछ ।