मधेशका मुख्यमन्त्री यादवको होर्डिङ बोर्ड मोह
टुडेपाटी–
जनकपुरधाम, बैशाख ८ गते ।
मधेश प्रदेशमा मुख्यमन्त्री फेरिएपनि अनावश्यक रुपमा गर्नेगरेको फजुल खर्चमा भने कुनै कमी आएको छैन् ।
गत पुस २७ गते मधेशको दोस्रो मुख्यमन्त्री बनेका सरोजकुमार यादवले शपथ लिएसँगै भ्रष्टाचारप्रति शून्य सहनशीलताको वाचा गरेका थिए ।
Sponsored
उनले आफू नेतृत्वको सरकार भ्रष्टाचार तथा फजुल खर्चमा कदापि नलाग्ने दाबी गरेका थिए । तर, उनको त्यो बोली बोलीमै सिमित भएको हो ।
मधेश सरकारले सामान्य होर्डिङ बोर्डकै नाममा लाखौं रकम खर्च गरिरहेको छ ।
मधेश भवनको एउटै स्थानमा १० दिनकै अन्तरालमा मुख्यमन्त्री यादवको तस्विर अंकित ठूला होर्डिङ बोर्ड परिवर्तन गरिसकेको देखिन्छ ।
Sponsored
त्यस्तै प्रदेशका अन्य स्थानहरुमा पनि ठूला–ठूला होर्डिङ बोर्डहरु झुण्ड्याइएका छन् ।
होर्डिङ बोर्डमा स्लोगन र मुख्यमन्त्रीको ठूलो तस्विर रहेको छ ।
युवा अभियन्ता सुशील कर्णले प्रदेश सरकार होर्डिङ बोर्ड तथा ब्यानरमै सिमित रहेको आरोप लगाए । उनले सरकारले उल्लेखनीय काम भने केही गर्न नसकेको जिकिर गरे ।
नयाँ योजनाभन्दा पनि पुरानै योजनाको प्रचारप्रसारका लागि बर्सेनि लाखौँको बजेट छुट्याइँदा प्रचारप्रसारको नाममा समेत भ्रष्टाचार भइरहेको उनको आरोप छ ।
सरकारले बाचा अनुसारका महत्वपूर्ण काम कुनै पनि पूरा गर्न नसकेको उनले बताए ।
मुख्यमन्त्री कार्यालयले आर्थिक वर्ष ०७८÷७९ मा प्रचारप्रसारका लागि ३१ लाख र ०७९/८० मा ८० लाख रुपैयाँ छुट्याएको थियो । जुन शीर्षकमा प्रचारप्रसारका लागि बजेट छुट्याइएको थियो सोही शीर्षकमा फेरि पनि लाखौँ रुपैयाँ छुट्याइएको छ ।
‘मुख्यमन्त्री बेटी पढाउ बेटी बचाउ’ अभियान सम्बन्धी होर्डिङ बोर्ड तथा ब्यानरका लागि ०७८/७९ मा १६ लाख र ०७९/८० मा ५० लाख रुपैयाँ बजेट छुट्याइएको थियो ।
त्यस्तै सोही अभियानको प्रचारप्रसारका लागि टिसर्ट र ब्याच खरिद गर्न पनि १५ लाख रुपैयाँ बजेट छुट्याइएको ।
प्रदेश सरकारको अर्को महत्वकांक्षी योजना मुख्यमन्त्री स्वच्छता अभियानसम्बन्धी होर्डिङ बोर्ड राख्नका लागि ३० लाख रुपैयाँको बजेट छुट्याइएको थियो ।
यसअघिका मुख्यमन्त्री र मन्त्रीहरुले पनि प्रचारप्रसारको नाममा अनावश्यक रुपमा ठाउँठाउँमा ठूलाठूला होर्डिङ बोर्डहरु लगाएका थिए ।
