जनकपुरधाम मेयर कप टी–२० : १० विकेटले जित निकाल्दै जनकपुर सेमिफाइनलमा

टुडेपाटी–
जनकपुरधाम, चैत २५ गते ।

जनकपुरधाम मेयर कप टी–२० मा जनकपुरले सिरहालाई १० विकेटले हराउँदै सेमिफाइनलमा प्रवेश गरेको छ ।

शनिबार जनकपुरधामको रजौल स्थित निर्माणाधिन रामजानकी बहुउदेश्यीय रंगशालामा भएको दोस्रो खेलमा ८४ रनको लक्ष्य पाएको जनकपुरले १०.२ ओभरमा जित निकालेको हो ।

जनकपुरका लागि कप्तान हरिशंकर साहले ३० बलमा ३६ र मयन यादवले ३२ बलमा ३० रन बनाएर अविजित रहे ।

बलिङ्गमा सिरहाका कुनै खेलाडीले विकेट लिन सकेनन् ।

यसअघि टस जितेर ब्याटिङ्ग गरेको सिरहाले १८ ओभरमा सबै विकेट गुमाउँदै ८३ रन बनाएको थियो । सिरहाको तर्फबाट शैलेन्द्र साहले सर्वाधिक १७ रन बनाए भने राकेश कामतले १६, कृष्ण साह १२ र अशोक यादवले ११ रन बनाए । बाँकी खेलाडी दोह्रो अंकमा रन बनाउन सकेनन् ।

बलिङ्ग तर्फ जनकपुरका विशाल सुशलिङ्गले ४ ओभरमा ८ रन दिएर ४ विकेट लिए भने कृष्ण कार्कीले ३ ओभरमा ८ रन दिएर ४ विकेट लिए । यस्तै अकाश रोयले २ विकेट लिए ।