जनकपुरधाम मेयर कप टी–२० मा हेटौँडा ५ विकेटले विजयी

टुडेपाटी–
जनकपुरधाम, चैत २५ गते ।

जनकपुरधाम मेयर कप टी–२० प्रतियोगितामा हेटौँडाले रौतहटलाई ५ विकेटले पराजित गरेको छ ।

शनिबार जनकपुरधाम १४ रजौलमा निर्माणाधिक रामजानकी बहुउदेश्यीय रंगशालामा टस जितेर ब्याटिङ्ग गरेको रौतहटले हेटौँडालाई १०९ रनको लक्ष्य दिएकोमा हेटौँडाले २३ बल बाँकी रहँदै ५ विकेटले जितेको छ ।

१०९ रनको लक्ष्य लिएर ब्याटिङ्ग गर्न आएको हेटौँडाले १६.१ ओभरमा ११० रन बनाउँदै ५ विकेटले जित निकालेको हो ।

हेटौँडाको तर्फबाट गौरव खडकाले सर्वाधिक ५० बलमा ५१ रन बनाएर नट आउट रहे । यस्तै, सुमन सुनारले १३, रामनरेश गिरीले १०, शुभ कन्सकरले ८, विशाल फुयालले ६, सक्षम बस्ताकोटीले ६ रन बनाए ।

बलिङ्गमा रौतहटका अभिशेक साह र सन्नी साहले २/२ विकेट लिए भने धर्मेन्द्र साहले १ विकेट लिए ।

यसअघि टस जितेर ब्याटिङ्ग गरेको रौतहटका अरविन्द चौधरीले सर्वाधिक ३६ रन बनाए । यस्तै, धर्मेन्द्र साहले २७ रन बनाउँदा बाँकी खेलाडी दोस्रो अंकमा रन बनाउन सकेनन् । रौतहट २० ओभर खेल्दै १०८ रन मात्र बनाउन सकेका थिए ।

बलिङ्गमा हेटौँडाका राम नरेश गिरीले ३ ओभरमा १२ रन दिएर ३ विकेट लिएभने शुभ कन्सकरले ४ ओभरमा २१ रन दिएर ३ विकेट लिए । यस्तै, अशिम श्रेष्ठ र विशाल फुयालले १/१ विकेट लिए ।

अर्धशतकीय पारी खेलेका हेटौँडाका खड्काले म्यान अफ द म्याचको उपाधी पाए ।