उपेन्द्र यादव जिते देशको विकास हुँदैन : केपी ओली

टुडेपाटी–
बारा, चैत २२ गते ।

नेकपा एमालेका अध्यक्ष केपी शर्मा ओलीले उपेन्द्र यादव जिते देशको विकास नहुने बताएका छन् ।

बुधबार बारामा आयोजित सभालाई सम्बोधन गर्दै अध्यक्ष ओलीले बारा–२ मा पुरुषोत्तम पौडेल जित्ने दावी गरे ।

उनले भने, ‘एमालेको विजय सुनिश्चित भइसकेको देखेको छु । यहाँ अनेक प्रकारका भ्रमपूर्ण विषाक्त नाराहरू लाग्न सक्छन् । जातीवादी नारा लाग्न सक्छन् । तपाईंहरू सतर्क रहनुहोला । वर्गीय प्रेम मात्रै सही र साँचो हुन्छ । जात जात भनेर गरिने प्रेम झुटो हुन्छ । यादवले जितेर भोकै मर्नुभन्दा अर्कैले जितेर खान लाउन पाए भएन ।’

यादव जिते देशको विकास नहुने भन्दै ओलीले भने,‘यादवज्यू मोरङ,सुनसरीबाट उखेलिनुभयो । लाटा सोझा जनता छन् भनेर उपेन्द्र बारामा आउनुभयो । उहाँ जितेपछि के गर्नुहुन्छ ? फूलमाला लगाउनुहोला । मन्त्री हुनुहोला । उहाँबाट विकास हुन्छ त ?’

एमालेको एउटै उद्देश्य देशमा गरिबीको अन्त्य गर्नु रहेको ओलीले बताए ।