सिरहाका यी युवकले अरबमा जिते ८२ करोडको चिठ्ठा

टुडेपाटी-
जनकपुरधाम, माघ २२ गते ।

सिरहाको गोलबजार–१२ का रञ्जितकुमार पालले युएईमा ८२ करोडको चिठ्टा जितेका छन् । उनले अरब इमिरेट्स (यूएई)को आबुधाबीस्थित बिग टिकटको राफल ‘लक्की ड्र’अन्तर्गत २३ मिलियन दिराम अर्थात् ८२ करोड रुपैयाँ बराबरको चिट्ठा जितेका हुन् ।

सात वर्षअघि एक रेमिट कम्पनीको प्रतिनिधि भएर कतार पुगेका १५ महिनादेखि चिट्ठा किन्न थालेका थिए । पाल बिग टिकटका प्रतिनिधिबाट चिट्ठा परेको खबर सुनेर आफू निकै खुसी भएको पालले बताए । उनी कतारकै सनैयास्थित एक मनी एक्सचेन्जमा कार्यरत छन् ।

उनले २० जनासँग मिलेर संयुक्त रूपमा ‘लक्की ड्र’को २३२९३६ नम्बरको टिकट अनलाइनमार्फत जनवरी १६ मा खरिद गरेका थिए । उनका साथीमध्ये अलग–अलग कम्पनीमा काम गर्ने सात नेपाली अनि अन्य भारतीय र श्रीलंकाली छन् ।
ठूलो धनराशिको चिट्ठा जिते पनि आफूले अहिले गरिरहेको कामलाई निरन्तरता दिने उनले बताए। उनका अनुसार एउटा टिकटको ५ सय दिराम पर्छ।

घरमा उनका बुवा, आमासहित १० र पाँच वर्षका २ छोरा छन्। परिवारका सदस्य सबै जना दंग रहेको उनले सुनाए । अहिले नै घर फर्कने योजना नबनाएको उनको भनाइ छ । बिग टिकट यूएईको अबुधाबीमा मासिक रूपमा खोलिने चिट्ठा हो। जहाँ हरेक महिनाको ३ तारिखमा विद्युतीय माध्यमबाट विजेता छनोट गरी घोषणा गरिन्छ ।