धनुषा प्रहरीको हिरासतबाट फरार ६ थुनुवा मध्ये एकजना पक्राउ

टुडेपाटी–

जनकपुरधाम, १७ गते ।

धनुषाको ईलाका प्रहरी कार्यालय सखुवामहेन्द्रनगरको हिरासत फोडेर फरार भएका ६ जना थुनुवाहरूमध्ये एकजना पक्राउ परेका छन् ।

पक्राउ पर्नेमा मिथिला नगरपालिका ६ का २८ वर्षीय रोशन महतो रहेका छन् ।

ईलाका प्रहरी कार्यालय महेन्द्रनगरको हिरासत कक्षबाट भित्ता फोडेर सोमबार बिहान ६ जना थुनुवा फरार भएका थिए ।

हिरासत कक्षबाटै थुनुवाहरू फरार भएपछि जिल्ला प्रहरी कार्यालय धनुषा र मधेस प्रहरी कार्यालयको संयुक्त टोलीले सर्च अपरेश टोली खटाएर खोजतलास तीव्र पारेको छ । सो टोलीले फरार थुनुवा मध्ये महतोलाई पक्राउ गर्न सफल भएको हो ।

महतोमाथी हातहतियार खरखजाना मुद्दा चलिरहेको छ । उनलाई हतियारसहित प्रहरीले गत शनिबार मात्रै पक्राउ गरेर सार्वजनिक गरेको थियो ।

यता फरार रहेका बाँकी ५ जनाको खोज तलाश तिव्र रूपमा भइरहेको प्रहरीले जनाएको छ ।